Prezidente Tribunál Rekursu, Deolindo dos Santos. Imajen /Egas Cristovão

DILI, 24 juñu 2020 (TATOLI) – Atu hala’o servisu Tribunál nian ho efikásia no efisiénsia, presiza tebes apoia rekursu umanu no rekursu finanseira. Iha utilizasaun dotasaun orsamentu temporáriu (DOT) ba Tribunál durante ne’e ladún fó  espasu sufisiente ba ofisial justisa sira hala’o sira-nia servisu, liuliu viajen lokál nian.

Prezidente Tribunál Rekursu (PTR), Deolindo dos Santos, hateten difikuldade maka kona-ba servisu julgamentu sira ne’ebé la’o presiza iha dilijénsia ho notifikasaun ne’e Tribunál hasai ba iha parte arguidu, suspeitu no sasin sira to’o iha area remota suku no aldeia sira.

“Tanba ne’e ho orsamentu temporáriu ne’e afeta orsamentu kustu ba viajen nian no servisu Tribunál presiza trata ho forma ne’ebé lalais,” hateten Presidente PTR Deolindo dos Santos, ba jornalista sira hafoin hasoru malu ho Primeiru-Ministru (PM), Taur Matan Ruak, ohin, iha Palaçio do Governo.

Deolindo dos Santos, klarifika katak iha mós difikuldade seluk kona-ba reativa julgamentu movel iha Tribunál Distritál sira hotu afeta mós ba orsamentu.

Iha dotasaun orsamentu temporáriu ba fulan juñ, tinan ne’e, ba orsamentu atividade viajen lokál alokadu ho valór $10.000 ba iha Tribunál Rekursu, Tribunál Distritál Dili, Baucau, Suai ho Oe-Cusse.

Nia dehan, ho orsamentu ne’e iha limitadu tebes hodi responde ba atividade servisu Tribunál nian, inklui la to’o para sustenta prosesu julgamentu movel ho dezlokasaun ofisiál justisa sira halo ba notifikasaun parte sira hodi bele hala’o julgamentu iha Tribunál sira.

Durante sorumutuk ne’e,  PTR Deolindo dos Santos, hato’o difikuldade sira-ne’e Primeiru Ministru (PM) Taur Matan Ruak, atu haree took, mezmu daudaun ne’e utiliza orsamentu dotasaun temporáriu halo oinsá bele aumenta tan valor orsamentu.

‘’Ha’u sei prepara karta pedidu ba Primeiru-Ministru kona-ba nesesidade orsamentu hira mak husu tan ho valór razoavel para fasilita servisu Tribunál nian,” tenik Deolindo dos Santos.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here