Ema balun (deskoñesidu) tuda kanek Magnífiku Reitór UNPAZ, Adolmando Amaral nia-ulun. Imajen/Foti hosi Facebook.

DILI, 22 juñu 2020 (TATOLI)- Ema balun  (deskoñesidu), ohin, lori fatuk tuda kanek  Magnífiku Reitór Universidade da Paz (UNPAZ), Adolmando Amaral, nia-ulun.

Notísia Relevante : UNPAZ Prontu Apoiu haloot Mate-Isin Hendrique

Polísia halo seguransa iha fatin akontesimentu. Imajen/Foti hosi Facebook

Insidente ne’e akontese bainhira Magnífiku Reitór  Adolmando, akompaña família matebian Henrique Maia Soares, reja hamutuk no halo ritual bolu fali matebian nia klamar iha fatin akontesimentu arredores UNPAZ nian.

Reitór Adolmando informa, parte estrutura UNPAZ kria ona liña koordenasaun di’ak tebes ho parte matebian nia  aman-inan, Domingos Maia ho Domingas Soares ho família hodi ba hamutuk Ospitál Nasionál Guido Valadares (HNGV) hodi akompaña prosesu autópsia ba mate-isin  Hendrique Maia Soares.

Husi ospitál, ekipa akompaña ambulánsia tula matebian ba iha rezidénsia iha Aldeia Evaka, Suku Bairo-Pité, Postu Administrativu Don Aleixo, Munisípiu Dili, hodi kontinua reza hamutuk. Nune’e iha tuku 17:00 Otl, ekipa Magnífiku Reitór ho família sira hala’o hela serimónia rituál remata atu fila ona, derrepente ema deskoñesidu lori fatuk tuda kanek reitór nia ulun.

“Ami ho família hala’o hela serimónia rituál hodi bolu hikas ita-nia alin matebian nia klamar iha fatin ne’ebé nia monu ba, depois ami lori matebian ba nia uma, ho estrutura UNPAZ mós organiza malu lori ai-funan no lilin ba halo adorasaun. Ami ba ne’ebá halo tiha adorasaun hotu ko’alia ho matebian nia-aman ho sira-nia maun alin-sira hotu hodi universidade apoiu nafatin too serimónia funerál ba matebian, no ami konkorda malu hotu tiha ho família sira husi Ermera fila ona maka iha grupu balun tuda husi kotuk, hodi ha’u mós han pankada fatuk kona ha’u nia ulun raan tiha,” informa Reitór Adolmando ba Agênsia Tatoli via telefone.

Reitór hatutan, mezmu nia ulun kanek, maibé nia parte kontinua koordena ho estrutura UNPAZ no família inklui apoiu husi Polisia Task Force Dili hodi akalma situasaun ne’ebé manas.

Reitór Adolmando lia tutan, mezmu nia ulun kanek, maibé nu’udar lider kontinua hatudu espíritu solidariedade koopera ho matebian nia família boot husi Ermera atu akompaña matebian too hala’o serimónia funerál ne’ebé termina ona tersa (23/06) iha Ermera.

“Ami kontinua halo mediasaun ho família boot Ermera atu akompaña matebian aban ba too iha Ermera,” nia afirma.

Hafoin hetan tuda, ekipa estrutura UNPAZ mós lori kedas Reitór ba konsulta iha ospitál no rezultadu hatudu kondisaun saúde no ulun di’ak hela, mezmu kanek ki’ik uitoan.

Iha parte seluk, Reitór UNPAZ mós rejeita informasaun ne’ebé sirkula iha públiku katak, família matebian no grupu deskoñesidu sira halo ameasa ba dosente no estudante sira husi UNPAZ nu’udar informasaun laloos.

Husi estrutura UNPAZ rasik hasai ona desizaun provizóriu suspende atividade hotu-hotu universidade nian too problema rezolve ona foin reativa atividade aprendizajen.

Antes ne’e Komandante Polisia Munisipiu Dili, Superintendente Xefe, Armando Monteiro dehan, hafoin akontesimentu PNTL too kedas fatin hodi akalma sitasaun no fó seguransa iha área ne’ebá hodi evita konflitu.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here