Joven ida ne'ebé mate fatin tanba deskunfia haksoit husi andár leten UNPAZ nian iha akontesimentu trajédia UNPAZ, domingu madrugada (21/06/2020). Imajen/Foti husi Facebook

DILI, 21 juñu 2020 (TATOLI)- Konfrontu iha Universidade da Paz (UNPAZ) ne’ebé akontese domingu ne’e, purvolta tuku 02:00 madrugada, halo komunidade no abitante hirak ne’ebé hela besik iha UNPAZ trauma no ta’uk tebes.

Joven na’in-ida mate tanba deskonfia haksoit husi andár leten bainhira halo provokasaun iha aula balun ne’ebé estudante estajiáriu feto sira hela ba. La’ós ne’e de’it, joven feto na’in-haat (4) no mane na’in-haat (4) sofre kanek kaman ho todan tanba hetan pankada fízika  husi grupu balun ne’ebé halo asaltu tama to’o arredores UNPAZ nian.

Husi konfrontu ne’e, autoridade seguransa kaer ema na’in-ida ne’ebé deskunfia mós hanesan suspeitu no detein mós estudante UNPAZ nian na’in-13 hodi submete ba investigasaun profunda.

Magnífiku Reitór UNPAZ, Adolmando Amaral, klarifika konfrontu ne’e akontese, tanba iha juventude na’in-haat (4) ne’ebé hela besik área UNPAZ halo “asalta” tama ba jardín UNPAZ hodi sa’e ba andár leten hodi tama kuarta ne’ebé estudante feto toba no hela hodi hala’o estájiu.

Derrepente estudante feto sira-ne’e hakilar iha andár leten, nune’e autór na’in-haat halai husi andár leten, na’in-tolu halai tuun tuir eskada no na’in ida halai haksoit tuun husi andár leten maka monu mate kedas iha fatin.

Iha akontesimentu ne’e, estrutura estudante kuaze 100-liu ne’ebé halo estájiu konsege kaer joven ida, nune’e, autór na’in-rua ne’ebé halai ba bolu vítima ida ne’ebé mate ninia família hodi halo kedas asaltu baku estudante sira iha eskola laran hodi rezulta na’in ualu (8), kompostu feto na’in-haat no mane  na’in-haat sofre kanek, no sasán barak hetan estragus.

“Alin ida mate ne’e mai husi ema li’ur maka halo asaltu ba iha estudante sira, depois maka nia monu husi andár leten. Alin ne’e monu tanba nia sa’e ba andár leten kalan boot ema toba hotu, nia ba loke tenda estudante labarik feto sira nian, entaun labarik sira hafodak halikar, alin ne’e mós halai la tuir fali dalan, maibé halai tuir fali ba dalan naruk hodi monu mate kedas,” Magnífiku  Reitór Adolmando haktuir kronolojia  ba jornalista sira iha Komandu PNTL, Caicoli, Dili.

Atu evita problema entre família ho estudante sira, Reitór UNPAZ dehan, sira-nia parte prontu koordena ho polísia inklui família sira halo tiha autópsia ba joven ida ne’ebé mate hodi rezolve problema tuir dalan família nian.

“Ita hein rezultadu investigasaun hotu, Universidade da Paz bele rezolve problema ho família tuir dalan família nian ka dalan legál,” nia hateten.

Adolmando mós rejeita informasaun kona-ba estudante sira hemu tua maka provoka situasaun, nu’udar informasaun ne’ebé laloos no nia parte mós rejeita la’ós estudante sira maka oho joven ida ne’ebé mate.

“Ne’e laloos, estudante sira la hemu tua tanba sira toba ona, maibé joven na’in -haat ne’ebé tama ba laran ne’e sira maka hemu tua ba ho kondisaun isin molik, tanba tuir informasaun joven ida polísia kaer kedas, rua halai no alin ida mate fatin,” Adolmando hateten.

Estudante na’in ualu ne’ebé joven no família matebian sira baku balun kanotak tohar, kanek iha ulun naklees agora iha hela ospitál.

Komandante Polísia Munisípiu Dili, Superintendente Xefe, Armando Monteiro no ekipa polisia Eskuadra Ai-mutin too kedas iha fatin akontesimentu hodi akalma situasaun.

Komandante Armando rasik seidauk bele fó sai identidade vítima ida ne’ebé mate no suspeitu ida hirak ne’ebé polísia kaer tanba sei iha prosesu investigasaun nia laran.

Komandante Armando hatutan, vítima ida ne’ebé mate daudaun ne’e polísia lori ona ba Ospitál Nasionál Guido Valadares (HNGV) hodi hala’o autópsia no suspeitu ida ne’ebé kaer daudaun ne’e ekipa sei investiga hamutuk ho estudante na’in-13 seluk.

Komandu PNTL rasik koloka ona membru hodi halo seguransa iha UNPAZ hodi evita konflitu entre família ho estudante sira.

 Jornalista : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here