Imajen/Espesiál.

DILI, 20 juñu 2020 (TATOLI)- Sekretáriu Jerál Resistência Nacional dos Estudantes de Timor-Leste (RENETIL), Joaquim Fonseca enkoraja membru tomak atu apoiu malu iha politika libertasaun povu, iha tempu ohin loron nian.

Notísia Relevante: Xanana Husu RENETIL Kontinua Luta Liberta Povu

Fonseca enkoraza membru sira ne’e, liuhosi diskursu komemorasaun loron ezisténsia RENETIL ba dala 32 (20 juñu 1988-20 juñu 2020), ne’ebé hala’o iha sede nasionál Faról, Dili.

Líder másimu RENETIL enkoraja membru sira atu tulun malu tanba haree ba situasaun politika rai laran  ne’ebé nasaun ne’e enfrenta ho durasaun tinan rua.

Fonseca hateten, nu’udár timoroan ne’ebé iha konsiénsia hanesan no iha objetivu hanesan, tuir loloos bele la’o hamutuk rezolve impase politika ne’ebé iha.

Nia dehan, oras ne’e daudaun membru RENETIL sira iha fatin hotu iha instituisaun estadu sira, balun  hanesan deputadu iha Parlamentu Nasionál, balun iha Governu, balun diplomata, balun iha Organizasaun Naun Governamentál sira, ida-idak iha ambiente diferente.

“Ho ida ne’e, presiza apoiu malu, tanba hosi uma fukun ida-ne’e, saida mak ita bele halo direta ita halo ona. Politika ne’e sempre hadau malu ba poder, ne’e natural no normál.  Dalaruma partisipa iha ne’eba ne’e mesak kompañeiru sira rasik. Entaun, hanesan membru organizasaun, dalaruma intervensaun sira ne’e taka matan de’it tanba haliis tiha ba sorin, hodi ofende fali ida seluk,” nia esplika.

Tanba ne’e, nia ekoraja membru RENETIL hotu ne’ebe oras ne’e envolve ona iha partidu politiku sira, kontinua halo politika no sira ne’ebé seidauk envolve iha partidu, atu ho livremente hili ka eskolla ida-idak nia partidu, bele harii partidu foun. Tanba, ho politika mak bele rezolve problema sira no ho politika mak bele halo ema moris. Importante la’o ho prinisípiu ida ne’ebé RENETIL komunga hamutuk mak partisipa direta iha luta libertasaun povu.

Estudante fundadór RENETIL na’in 10 ne’e mak hanesan, Fernando de Araújo (La’ Sama), José A.M.X. Gonçalves (Si’ak), Lucas da Costa (Lahe Mau/Rama Metan), Carlos da Silva Lopes (Freezip/Radihka Saky), Agapito Cardoso (Mau Loco), Marciano Octávio Garcia da Silva (Chury Sakar Subar), Júlio Abel Ribeiro (Tae Tudak), João de Araújo (Mau Terus), Adolfo Fontes Soares (Mau Lamas) no João Cardoso Fernandes (Mau Riba).

Ezekutivu RENETIL atuál mak hanesan, Sekretáriu Jerál Joaquim Fonseca, Primeiru Vise Sekretáriu Jerál Francisco Belo no Segundu Vise Sekretáriu Jerál Natalina Aparicio.

Partisipa iha Serimónia komemorasaun ne’e maka, fundadór sira, ezekutivu sira, no membru RENETIL tomak.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here