Sekretáriu Jerál Rezisténsia Nasionál Estudante Timor-Leste (RENETIL), Joaquim Fonseca, hasai retratu hamutuk ho Eis Komandante da Luta Kay Rala Xanana Gusmão, hafoin partisipa misa agradesimentu aniversariu Xanana Gusm~ao ba dala-74 iha igreja Balide. Imajen/RENETIL.

DILI, 20 juñu 2020 (TATOLI)–Sekretáriu Jerál Jerál Resistência Nacional dos Estudantes de Timor-Leste (RENETIL), Joaquim Fonseca hateten, lider nasionál Kay Rala Xanana Gusmão husu ba RENETIL atu kontinua kontribui hodi luta ba libertasaun povu.

Joaquim Fonseca hateten lia hirak ne’e, durante diskursu komemorasaun loron ezisténsia RENETIL ba dala-32 (20 Juñu 1988-20 Juñu 2020) ne’ebé hala’o iha sede nasionál Faról, Dili.

“Ohin, ha’u partisipa iha misa agradesimentu ba Eis Komandante da Luta Kay Rala Xanana Gusmão ne’ebé halo aniversáriu moris nian ba dala-74. Ha’u hato’o parabéns no ha’u mós hateten ba nia katak ohin mós RENETIL halo tinan. Xanana hato’o ninia haku’ak boot ba membru RENETIL tomak no fó parabéns, ho lia-menon atu kontinua nafatin ita-nia luta, kontinua nafatin ita-nia kontribuisaun ba luta libertasaun povu,” Fonseca haklaken mensajen Xanana ba membru sira, sábadu ne’e..

Tanba ne’e, Fonseca mós enkoraja membru sira ne’ebé namkari iha Timor laran tomak atu buka apoiu malu iha politika libertasaun povu, iha tempu ohin loron nian.

Nia husu ba membru hotu iha Timor laran tomak, atu kontinua partisipa direta iha luta libertasaun povu, tuir prinsipiu RENETIL ne’ebé komunga hamutuk iha tinan 32 liu ba.

Entretantu, livru RENETIL iha Luta Libertasaun Timor-Lorosa’e ho títulu “Antes Sem Título, Do Que Sem Pátria” esplika kona-ba motivu sira ne’ebé dudu estudante sira harii RENETIL hodi luta ba ukun-rasik-aan, luta ba injustisa ho violasaun direitu ema-nian oin-oin ne’ebé Indonezia halo hasoru timoroan sira, haboot mós sentimentu anti okupasaun Indonézia nian iha Timor-Lorosa’e.

Iha livru ne’e deskreve, buat hotu-hotu hakat hosi espiritu, vontade luta, no dever atu defende direitu povu Timor- Lorosa’e nian: ukun-an total no kompleta ba Timor-Lorosa’e (Saky, 2013, p. 50).

RENETIL hari iha loron 20 fulan Juñu tinan 1988, hosi estudante na’in 10 ne’ebé estuda iha Denpasar, Bali, Indonézia.

Estudante fundadór RENETIL na’in 10 ne’e mak hanesan, Fernando de Araújo (La’ Sama), José A.M.X. Gonçalves (Si’ak), Lucas da Costa (Lahe Mau/Rama Metan), Carlos da Silva Lopes (Freezip/Radihka Saky), Agapito Cardoso (Mau Loco), Marciano Octávio Garcia da Silva (Chury Sakar Subar), Júlio Abel Ribeiro (Tae Tudak), João de Araújo (Mau Terus), Adolfo Fontes Soares (Mau Lamas) no João Cardoso Fernandes (Mau Riba).

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here