Xanana Gusmão ho labarik sira hala’o limpeza iha área Jardin Motaél, Dili, hosi selebra nia tinan ba dala-74, sábadu (20/06/2020). Imajen/Eugénio Pereira

DILI, 20 juñu 2020 (TATOLI)- Lider Karizmátiku, Kay Rala Xanana Gusmão, ohin, kompleta tinan-74  (20 juñu 1946-20 juñu 2020).  Komandante ein-Xefe FALINTIL ne’e hetan apresiasaun no votu parabéns husi ema oioin no entidade oioin iha rai-laran ho mós husi rai-li’ur.

Notísia Relevante : Xanana Mak Povu, Povu Mak Xanana

Iha dadeer de’it, purvolta tuku 06:00 liu minutu balun, Xanana hetan ona surpreza husi nia-oan feto Zenilda Gusmão ne’ebé lori ho kedas dosi (cake) hodi oferta ba Xanana no tuir kedas oferta simples balun husi  membru Corpo Seguransa Pesoál (CSP) ne’ebé durante ne’e fó eskolta ba nia  ho mós jornalista sira ne’ebé durante ne’e halo kobertura ba Xanana nia atividade tama-sai munisípiu hodi hala’o asaun karidade.

La hotu ho ne’e, madre sira mós aproveita oportunidade ida-ne’e hakat to’o Xanana nia rezidénsia iha Lecidere, Dili, hodi  hato’o votu parabéns diretamente ba Xanana no  entrega mós lembransa fotografia Amu Papa Francisco (Jorge Mario Bergoglio) nian ba Xanana.

Liu minutu balun, Sekretáriu Jerál Partidu CNRT, Francisco Kalbuadi Lay, liuhusi nia ekipa lori mós surpreza dosi cake  ho sampana ba Xanana hodi halo video call ho Francisco Kalbuadi Lay ne’ebé oras ne’e iha hela Australia.

Liuhusi meiu komunikasaun video call iha WhatsApp ne’e, Francisco Kalbuady Lay, hato’o profunda votu parabéns ne’ebé akompaña mós ho múzika.

Xanana halo limpeza iha Jardin Motaél, Dili, sábadu (20/06/2020). Imajen/Eugénio Pereira

Simu tiha surpreza sira ne’e no huu tiha lilin aniversáriu sira hirak ne’ebé oferta ba nia iha nia loron espesiál ne’e, Xanana ho kalsa badak ida, taka xapeu no hatais kamiza bosan ida sai husi nia rezidénsia hodi ba festeja nia aniversáriu iha Jardin Igreja Motaél nian ho halo limpeza jerál.

To’o iha Jardin ne’ebé inísiu atu konstrui hanesan Jardin 12 Novembru Motael, Xanana komesa halo limpeza no labarik lubun iha area Motaél nian halai hakbesik ba Xanana hodi ajuda Xanana halo mós limpeza hodi hamoos no foti hotu fo’er sira ne’ebé hafutar iha jardín laran.

Iha limpeza ne’e Xanana husu ba labarik sira tenke badinas hamoos fo’er nu’udar asaun ida hadomi natureza no hadomi ambiente iha uma ninin, iha sosiedade no iha nasaun laran.

“Ita limpeza tiha maka avó fahe dosi, agora imi limpeza lai ne’e, tanba ita tenke hadomi ita nia rain ho hamoos beibeik fo’er hanesan ezersísiu ki’ik ida atu anima malu no motiva malu,” Xanana lia-tun ba labarik sira.

Fatin hanesan, Komandante Ekipa Bombeiros Dili, Paulo Maia hato’o agradese no parabéns ba Xanana, tanba mezmu halo aniversáriu, maibé Xanana sempre konvida Bombeiro hodi partisipa iha eventu sira-ne’e.

“Parabéns maun boot, ohin halo tinan, maibé konvida ami mai hodi selebra aniversáriu ho atividade limpeza ne’e buat ida di’ak tebes ba ita nia rain,” hateten  Paulo Maia.

Durante hala’o limpeza jerál, ema barak ne’ebé liu iha estrada públiku para karreta no motór lori labarik ki’ik too ema boot aproveita hodi kumprimenta no hato’o votu parabéns ba Xanana.

Tuir oráriu, iha tuku 15:00 Otl, sei selebra misa agradesimentu ba Xanana nia tinan-74 ne’ebé sei hala’o iha Igreja Balide Dili.

Selebrasaun misa agradesimentu ne’e prezide husi Amu Angelo Salsinha no akompaña husi Amu Pároku  Balide, Padre Graciano. Enkuantu, Xanana mak lee segunda leitura.

Hafoin misa, Xanana sei selebra aniversáriu hamutuk ho família no amigu sira iha Igreja Balide, no iha loron domingu (21/06), Xanana sei selebra aniversáriu hamutuk família boot ema ho defisiénsia.

Notísia Relevante : CNRT Hato’o Felisitasaun Ba Xanana Gusmão

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here