Prezidente Parlamentu Nasional, Aniceto Longuinhos Guterres Lopez. Imajen/Antonio Goncalves.

DILI, 19 juñu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopez, husu ba eis titutár hosi órgaun soberanu sira atu partisipa iha atividade Konsellu Konsultivu Fundu Petrolíferu (CCFP-sigla portugés) tanba Lei Fundu Petrolíferu (LFP) númeru 9/2005 mak fó kompeténsia ida-ne’e.

Notísia Relevante: Aniceto Guterres Fó Pose Juvinal Dias Nu’udar Prezidente KKFP

Aniceto Guterres ko’alia asuntu ne’e tanba Lei Fundu Petrolíferu númeru 9/2005 artigu 26 (a-i) hosi Kapítulu V mak regula membru KKFP mak hanesan Eis Prezidente-Repúblika, Eis Prezidente Parlamentu Nasionál ne’ebé ezerse funsaun tinan 3 liu, Eis Primeiru-Ministru ne’ebé ezerse funsaun tinan 3 liu no Eis Ministru/a Finansa ne’ebé kumpri ona kna’ar tinan 3 liu, nune’e mós Eis Governadór Banku Sentrál Timor-Leste (BCTL-sigla portugés) ne’ebé kumpri ona kna’ar tinan 3 liu.

Lei Fundu Petrolíferu númeru 9/2005 mak sai hanesan baze legál ba estabelisimentu Konsellu Konsultivu Fundu nu’udar órgaun Estadu nian. Bazeia ba LFP kapítulu V, artigu 25.2 no mós artigu 30.4 fó mós kompeténsia prinsipál rua ba KKFP

Dahuluk, nia esplika, hato’o pareser ka asesoria ba Parlamentu Nasionál, bainhira Governu hato’o proposta hodi hasai osan hosi Fundu Petrolíferu ba Orsamentu Jerál Estadu (OJE) no daruak molok hato’o pareser ba Parlamentu Nasionál, KKFP tenke halo konsulta públiku liuhusi kolokiu anuál.

Maske CCFP estabelese dezde 2016 maibé to’o 2018 kompozisaun ne’e seidauk kompletu tanba reprezentante Eis Prezidente Repúblika, Eis Prezidente Parlamentu Nasionál, Eis Primeiru-Ministru, Eis Ministru/a Finansa no Eis Governadór Banku Sentrál Timor-Leste (BCTL-sigla portugés) seidauk hola parte ka delega reprezentante nu’udar membru KKFP.

Tuir nia, durante ne’e eis titulár hosi órgaun soberanu hirak ne’e seidauk asume responsabilidade ida-ne’e hodi kontribui ba atividade KKFP nian.

Durante ne’e, nia hateten, órgaun ne’ebé hola papél ne’e mak reprezentante Parlamentu Nasionál na’in-rua (2), reprezentante Sosiedade Sivíl na’in-rua (2), reprezentante Emprezáriu Nasionál na’in-ida (1) no reprezentante Konfisaun Relijiozu na’in-ida (1)

Prezidente PN dehan, importánsia hosi órgaun ida-ne’e hatudu duni ho nia kompozisaun ne’ebé fó espasu ba eis titulár órgaun soberania ninian, inklui figura ho rekoñesida kompeténsia hosi sosiedade sivíl no konfisaun relijioza hodi hola parte iha órgaun konsultivu ne’e.

Nia dehan, ezisténsia órgaun ne’e ho nia kompozisaun no kompeténsia ne’ebé Lei Fundu Petrolíferu númeru 9/2005 fó hodi tulun Parlamentu Nasionál no Governu atu halo desizaun polítika no halo lejizlasaun.

“Infelismente situasaun no preokupasaun lubuk ida halo eis titulár sira iha tempu natoon atu hola parte ativu iha konsellu konsultivu nia kna’ar. Ita hein katak eis titulár sira hosi órgaun soberania sira bele hola-parte ativu iha atividade iha órgaun ne’e hodi fó prestijiu boot liu ba própriu órgaun konsultivu ne’e ho nia pareser sira ba parlamentu no Governu,” dehan Deputadu Aniceto Guterres hafoin fó pose ba Prezidente CCFP Foun, Juvinal Dias, iha Parlamentu Nasionál, sesta ne’e.

Tanba, tuir nia, rekursu petróleu iha mundu sai fatór determinante ba vida polítika no ekonómika nasaun nian no relasaun entre nasaun sira.

Iha nasaun barak iha mundu ne’ebé produtór ba fundu minarai, nia deklara, maibé oituan de’it mak uza loloos ba povu tomak nia moris di’ak hodi kondisiona nasaun nia estabilidade ekonomia.

“Situasaun ida-ne’e mak halo ita foti konkluzaun katak mina ka petróleu bele sai bensaun no bele mós sai malisaun ba país. Depende ba ukun na’in sira-nia kompeténsia polítika, integridade morál no perspetiva estratéjiku. Timor-Leste tama iha kompleksidade ida-ne’e no ita lakohi sofre kedas malisaun ne’ebé rai seluk sofre tiha ona no oras ne’e sei sofre hela”, nia katak.

Prezidente Parlamentu Nasionál ne’e hateten, Timor-Leste ho potensialidade naturál ne’ebé iha, laiha razaun depende ba minarai no halo rekursu minarai ida-ne’e sai fonte ekonómika únika ba Timor-Leste. Tanba ne’e, tenke mobiliza potensialidade umana tomak hodi jere konsellu konsulta ne’e.

Deputadu Aniceto Guterres hateten, ezisténsia órgaun ne’ebé trata asuntu importantísimu ba estabilidade no sustentabilidade ekonómika ba nasaun ida-ne’e hosi impaktu pandémia COVID-19 halo presu minarai mundiál tún.

Oras ne’e, nia haktuir, fundu minarai monu rabat loos maibé timoroan hotu sente orgullu ba Estadu ne’ebé kria ona órgaun konsulta ida-ne’ebé hamriik iha lejizladór no ezekutivu nia sorin.

“Hodi fó hanoin asuntu ida-ne’ebé to’o agora sai fonte dizaminadór ba Timor-Leste nia ekonomia. Tanba, rekursu petrolíferu iha nia kompleksidade téknika, iha kompleksidade polítika no ekonómika ba Timor-Leste, ho nia dimensaun iha relasaun internasionál maka halo estadu harii órgaun ida-ne’e hodi fó hanoin no tetu lisuk kona-ba fundu petrolíferu ka fundu soberanu ne’e,” Aniceto Guterres haklaken.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here