Prezidente Parlamentu Nasional, Aniceto Longuinhos Guterres Lopes .Imajen/Antonio Goncalves

DILI, 19 juñu 2020 (TATOLI)—Prezidente Parlamentu Nasionál, Aniceto Longuinhos Guterres Lopez, ohin, fó pose ba Juvinal Dias sai nu’udar Prezidente Konsellu Konsultivu Fundu Petrolíferu (CCFP-sigla portugés) foun hodi troka Padre Júlio Crispim Ximenes Belo.

Iha serimónia asinatura ba termu pose entre Prezidente KKFP Foun, Juvinal Dias, no Prezidente Sesante, Pe. Júlio Crispim Ximenes Belo, hasasin hosi sasin Prezidente Parlamentu Nasionál, Deputadu Aniceto Guteres no membru deputadu sira seluk.

Bazeia ba Lei Fundu Petrolíferu (LPF) númeru 9/2005 kapítulu V, artigu 25.2 no mós artigu 30.4 mak sai baze legál ba CCFP nia konselleiru sira hodi ezerse sira-nia mandatu.

Durasaun mandatu bazeia ba Lei Fundu Petrolíferu artigu 27.1 deskreve mandatu membru konsellu konsultivu hosi LFP ba tinan-lima, signifika kada membru CCFP hala’o funsaun hanesan konselleiru durante tinan 5 nia laran de’it . Prezidente Parlamentu Nasionál mak sei fó pose fali ba membru foun bainhira membru tuan nia mandatu ramata.

Estrutura CCFP 2018 mak hanesan Prezidente mak Konselleiru Pe. Júlio Crispim Ximenes Belo agora transfere ona ba konselleiru Juvinal Dias, Sekretária mak Konselleira Zélia Fernandes. Membru CCFP kompostu hosi Konselleiru José Augusto Fernandes Teixera, konselleira Júlio Fernandes no konselleira Izilda Pereira Santos.

Kompozisaun membru CCFP segundu no terseiru mandatu tinan 2018 nian kompostu hosi Konselleiru José Augusto Fernandes Teixeira no Konselleira Izilda Manuela da Luz Pereira nu’udar reprezentante Parlamentu Nasionál, Konselleiru Juvinal Diaz no Konselleira Zélia Fernandes nu’udar reprezentante Sosiedade Sivíl, Konselleiru Júlio Fernandes reprezenta Emprezáriu Nasionál no Konselleiru Pe. Júlio Crispim Ximenes Belo reprezenta Konfisaun Relijioza.

Maibé tuir Prezidente Parlamentu Nasionál, Aniceto Guterres, informa mandatu konselleiru Pe. Júlio Crispim Ximenes Belo ramata ona.

“Ha’u haruka ona karta notifikasaun ida ba Konfisaun Relijioza sira liuhosi Arsebispu atu nomeia hikas membru foun hodi substitui Padre Júlio Crispim. Maibé ho preferénsia designasaun foun ne’e mai hosi Igreja Katólika maibé to’o daudaun ne’e seidauk hetan informasaun, loloos pose ohin, entaun ida-ne’e seidauk akontese,” dehan Aniceto Guterres iha ninia diskursu iha Parlamentu Nasionál, sesta ne’e.

Bainhira iha ona indijitasaun hosi Igreja Katólika, nia hateten, Prezidente Parlamentu Nasionál sei fó pose ba membru foun ne’e.

Prezidente Parlamentu Nasionál fó nia apresu no agradese wain ba konselleiru sira iha mandatu ida-ne’e, ne’ebé serbisu halo krítika ne’ebé hatudu ona iha relatóriu ne’ebé ohin halo lansamentu.

Prezidente PN ne’e agredese ba Prezidente Sesante, Padre Júlio Crispim, ne’ebé hakotu ona nia mandatu nu’udar konselleiru no prezidente konsellu liuhosi ninia dedikasaun no kontribuisaun tomak ba konsellu ida-ne’e. 

Prezidente Pralamentu Nasionál ezije ba membru deputadu, membru Governu sira no ukun na’in sira hotu ne’ebé iha podér hola desizaun polítika atu fó tempu ba halo leitura no konsidera ‘netik’ pareser hosi CCFP ne’ebé husu tenke konsidera fatór sira-ne’ebé fó influénsia ba fundu minarai.

“Ha’u hakarak enkoraja konselleiru sira-ne’ebé mandatu tuir-mai kontinua halo abordajen krítika no kle’an kona-ba fundu petrolíferu ba Timor-Leste. Sura ho ha’u-nia apoiu, deseja susesu ba konsellu konsultivu fundu petrolíferu,” nia fó hanoin.

Entretantu, Prezidente CCFP Foun, Juvinal Dias, hateten konsellu sei hala’o kna’ar fó asesora ka pareser ba Parlamentu Nasionál no Governu ho kualidade kona-ba estabilidade no sustentalidade fundu minarai.

“Konsellu halo nia kna’ar hodi hato’o pareser tuir Lei Fundu Petrolíferu fó kona-ba utilizasaun fundu ba Orsamentu Jerál Estadu no hosi mandatu ida-ne’e konsellu kontinua fó pareser ne’ebé mak mais krítiku no konstutivu oinsá fundu ne’e labele hotu iha jerasaun ida-ne’e nia laran tanba Timor-Leste nia rekursu únika mak fundu petrolíferu,” Prezidente KKFP foun ne’e hateten.

Prezidente ne’e promete sei halo asesoaria ka pareser ho krítiku liu tanba baze fundamentál mai hosi aspirasaun komunidade, objetivu ida-ne’e atu iha diskusaun alternativu iha Parlamentu Nasionál hodi bele iha jestaun ka polítika di’ak ida atu asegura fundu petrolíferu bele benefísia jerasaun sira iha futuru, tanba konsellu hanoin katak fundu bele uza ba futuru Timor-Leste nian.

Tuir nia, fundu petrolíferu hanesan rekursu únika ne’ebé Timor-Leste iha tanba ne’e presiza halo jestaun ho didi’ak.

“Ita presiza fó pontu de vista atu parlamentu no Governu foti desizaun di’ak liu tanba kuandu ita husik levantamentu hosi fundu petrolíferu ba orsamentu estadu tuir polítiku sira-nia hakarak, sein kontrolu hosi sosiedade entaun fundu ne’e loron ida sei sai de’it istória ba ita,” nia fó hanoin.

Nia husu Parlamentu Nasionál no Governu atu konsidera fatór prinsipál haat (4) ne’ebé influénsia dezempeñu fundu petrolíferu mak hanesan merkadu finanseira, rezerva petrolíferu, presu minarai mundiál no levantamentu fundu minarai ba Orsamentu Jerál Estadu (OJE).

“Husi fatór tolu hosi fatór haat ne’e ita labele kontrola,”  Prezidente CCFP Foun fó hanoin ba órgaun lejizladór no ezekutivu.

Mandatu Prezidente CCFP Foun, Juvinal Dias, sei ramata iha dezembrun 2022.

Serimónia tranferénsia kargu hosi Prezidente Konsellu Konsultivu Fundu Petrolífetu (CCFP-sigla portugés) Sesante Pe. Júlio Crispim Ximenes Belo ba Prezidente Eleitu, Juvinal Dias no lansamentu relatóriu anuál 2016 to’o 2018 husi KKFP ne’e marka prezensa husi Prezidente Parlamentu Nasionál, Deputadu Aniceto Guterres, deputadu no deputada sira no reprezentante Governu atuál Ministru Asuntu Parlamentár no Komunikasaun Sosiál, Francisco Jerónimo.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here