Ministru Defeza no Seguransa no Ministru Interiór interinu, Filomeno da Paixão de Jesus. Imajen Tatoli/Egas Cristovão

DILI, 17 juñu 2020 (TATOLI) – Ministru Defeza no Seguransa no Ministru Interiór interinu, Filomeno da Paixão de Jesus, hateten Servisu Migrasaun Timor-Leste hahú koordena ho Embaixada Vietname no Indonézia atu halo prosesu deportasaun ba sidadaun estranjeiru na’in-13.

Sidadaun hirak ne’e kompostu husi na’in-11 husi Vietname no na’in-rua husi Indonézia hamutuk ho ró ida, ne’ebé atraka iha illa Jaco, Postu Administrativu Tutuala Munisípiu Lautém tamba kombustível hotu iha loron 12 juñu.

“Prosesu kuaretena obrigatóriu durante loron 14 ba prevesaun COVID-19 hotu ita prosesa kedan atu entrega ba embaixada idaidak no deporta sira,” tenik Ministru Filomeno iha Palásiu Governu, kuarta ne’e.

Notísia Relevante: COVID-19: Rezultadu Ezame Laboratóriu ba Sidadaun Estanjeiru Na’in-13 Negativu

Iha momentu ne’ebá, ekipa Unidade Resposta Rápida Sala Situasaun, Sentru Intregradu Jestaun Krize (CIGC,sigla portugés) hamutuk ho Polísia Nasionál Timor-Leste (PNTL) to’o kedan iha fatin sidadaun estrajeiru sira para no halo kedan intervensaun no lori bá Dili hodi kumpre kuarentena obrigatóriu.

“Kumpre loron kuartena hotu maka entrega ba sira-nia embaixada atu haruka fila tanba sira kontra lei no tama ilegalmente mai territóriu Timor-Leste,” nia akresenta.

Antes ne’e, Portavós no Koordenadór Ofisiál Ligasaun Forsa Tarefa COVID-19 CIGC, Rui Maria de Araújo, informa sidadaun estranjeiru hirak ne’e halo ona ezame laboratóriu tanba durante loron 10 iha tasi laran konsidera tama ona kritéria inkubasaun, maibé rezultadu ezame laborátoriu hatudu negativu ba COVID-19.

Sira halo viajen husi sidade Kendari, Provínsia Sulawesi Tengara, iha Indonézia no tama ho sira nia ró iha illa Jaco tanba presiza ajuda kombustível hodi bele kontinua sira nia viajen iha tasi laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here