Portavóz no Koordenadór Ligasaun Ofisiál ba Forsa Tarefa COVID-19 CIGC , Rui Maria de Araújo. Imajen Tatoli/Egas Cristovão

DILI, 15 juñu 2020 (TATOLI) – Sidadaun estranjeiru na’in-13, ne’ebé kompostu husi na’in-11 husi Vietname no na’in-rua husi Indonézia hamutuk iha ró ida, ne’ebé kombustível hotu iha illa Jaco, Postu Administrativu Tutuala, Munisípiu Lautém iha loron 12 juñu, ekipa Unidade Resposta Rápida Sala Situasaun, Sentru Intergadu Jestaun Krize (CIGC, sigla portugés) hala’o ona ezame laboratóriu no nia rezultadu negativu.

Portavóz no Koordenadór Ofisiál Ligasaun Forsa Tarefa COVID-19 CIGC, Rui Maria de Araújo, hateten sidadaun estranjeiru hirak ne’e nia ró avaria no sira labele fila ba tasi ne’ebé autoridade Munisípiu Lautém, hamutuk ho CIGC transfere mai kuarentena iha Dili.

Hafoin to’o iha Dili no hela iha kuaretena fasilidade Governu ekipa Ministériu Saúde (MS) halo ezame laborátoriu ba sidadaun estranjeiru hirak ne’e tanba durante loron 10 iha tasi laran ne’ebé tama ona kritéria inkubasaun.

“Hafoin halo ezeme laborátori nia rezultadu hatudu negativu ba COVID-19, ne’ebé daudaun ne’e sei kontinua iha kuarentena no kontinua autoridade kompetente sira mós akompaña hodi haree prosesu tuirmai,” tenik Portavóz liuhosi konferénsia imprensa iha Sentru Mídia COVID-19, iha Sentru Konvesaun Dili (CCD, sigla portugés), segunda ne’e.

Sidadaun Vietname na’in-11 kompostu husi mane na’in-sia no feto na’in-tolu, hamutuk ho sidadaun Indonéziu na’in-rua, ne’ebé halo viajen loron 10 liubá husi sidade Kendari, Provínsia Sulawesi Tengara, iha Indonézia, tama ho sira-nia ró iha illa Jaco tanba presiza ajuda kombustível hodi bele kontinua sira nia viajen iha tasi laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here