Komunidade Suku Atabae, Postu Administrativu Atabae, Munisípiu Bobonaro, simu Xanana ho tanis, tersa (16/06/2020). Imajen/Eugénio Pereira

MALIANA, 18 juñu 2020 (TATOLI)-Prezidente Konferénsia Episkopál Timorense nu’udar mós Bispu Dioseze Maliana, Don Norberto Amaral, agradese no apresia tebes ho asaun karidade ne’ebé halo husi lider karizmátiku, Kay Rala Xanana Gusmão, hodi tulun povu kbiit-laek sira iha área rurál.

Notísia Relevante : Don Norberto ho Xanana Ko’alia Selebrasaun Tinan-10 Dioseze Maliana

Prezidente Konferénsia Episkopál nu’udar mós Bispu Dioseze Maliana, Don Norberto Amaral. Imajen/Antonio Goncalves

Bispu Norberto Amaral, dehan bainhira sarani sira halo asaun karidade nu’udar asaun di’ak atu bele manan prémiu ba Lalehan. Tanba ne’e husu atu Timoroan lolo liman fó apoiu ai-han ba povu ne’ebé presiza tulun iha ámbitu Estadu Emerjénsia hodi luta kontra propagasaun surtu Coronavirus ka COVID-19 iha Timor-Leste.

“Nu’udar sarani, Xanana iha devér hodi halo asaun karidade ida-ne’e hodi tulun fali sarani sira ne’ebé presiza ai-han, tanba ho karidade ida ne’e, mak sai sasukat ba Lalehan. Se mak ko’alia politiza asaun ne’e, tuir loloos nia iha obrigasaun atu halo asaun karidade hanesan Xanana,”  afirma Don Norberto, ba jornalista sira iha nia rezidénsia iha Ritabou, Maliana, Bobonaro, tersa ne’e.

Iha fatin hanesan, Madre Kongregasaun Crarissas  iha Suku Tunubibi, Postu Administrativu Maliana, Munisípiu Bobonaro, Irmán Maria Fernanda, orgullu tebes bainhira asiste asaun Xanana hodi fahe ai-han inklui hakuak no rein ema defisiénsia no ema kbiit-laek sira nu’udar ezemplár hanesan lider ne’ebé hadomi nia povu no hadomi nia emar sira.

“Ami agradese no haree ita nia viajen hale’u munisípiu hodi apoia ita nia povu, ita hatudu domin boot tebes ba povu, ami la iha buat ida, maibé ami nunka haluha atu hasa’e ami nia orasaun ba Aman Maromak atu tulun ita, ita  nia povu no ita nai rain,” Madre Fernanda lia-tun ba Xanana.

Asaun karidade sira iha Munisípiu-Tolu

Inan-feton sira lelir hasoru Xanana iha Suku Tunubibi, Postu Administrativu Maliana, Munisípiu Bobonaro, tersa (16/06/2020). Imajen/Eugénio Pereira

Iha Xanana nia viajen halo asaun karidade durante loron-tolu kobre Munisípiu Ermera (Hatulia, Letefoho, Atsabe), Bobonaro (Hauba, Marobo, Bobonaro Vila, Maliana; Ratabou, Tunbibi, Atabae) ho Munisípiu Liquiça iha Suku Gisu, Loes, Postu Administrativu Maubara.

Durante vizita ba fatin hirak-ne’e, populasaun sira simu ho entuziazmu no tuir suku ida-idak nia lisan no tradisaun, hodi tara-tais, hamulak, look bua-malus, no hamulak ba rai-lulik no fatuk-lulik atu kontinua fó vida naruk no matak malirin ba Xanana Gusmão.

Nesesidade ne’ebé Xanana ho intelektuál no emprezáriu lokál husi munisípiu ida-idak fahe ba populasaun kbiit-laek sira, mak hanesan foos, mina, supermi no seluk-seluk tan.

Xanana fahe mós foos ho mina povu Suku Hauba hamutuk 100-resin ne’ebé autoridade sira identifika ona, hafoin ida ne’e kontinua vizita mós rezidénsia vítima Masakre  1999, Virgina de Jesus ne’ebé milísia sira koa nia inus no oho nia aman, Saudozu Egas Cardoso no inan Saudoza Aliansa de Jesus iha Suku Lourba-Bobonaro iha 1999.

Iha parte hanesan, Xanana akompaña husi Intelektuál Marobo-oan, Maria Maria Goreti Barreto, fahe mós ba livru no lapizeira ba estudante sira husi suku tolu Marobo komples nian, no kontinua viajen ba Igreja Parokia Bobonaro akompaña husi Administradór Parokiál, Carlos Gonçalves no autoridade sira.

Xanana akompaña husi veteranu no eis membru Parlamentu Nasional,  Roke kontinua hala’o asaun karidade hodi fó apoiu foos, mina ba povu Aldeia tolu hanesan, Maahui, Daitete no Rituudo, Suku Ritabou, Postu Administrativu Maliana.

Iha tempu loro-kraik, Xanana kontinua vizita mós Suku Tunubibi, Aldeia Alekou, Suku Ritabou, hodi fó apoiu ai-han ba povu kbiit-laek 200- resin. Hafoin ida ne’e, iha tempu kalan, vizita mós Suku Atas, Suku Atabae, no Postu Administrativu Atabae hodi fahe mós foos ba populasaun kbiit-laek 300-resin

Iha enkontru ne’e, Xefe Suku Atas, Diamantino dos Santos ho Xefe Suku Atabae, Paulino Malibere dehan problema ne’ebé povu sira enfrenta maka kondisaun estrada aat, falta bee-moos no aldeia balun too agora seidauk asesu ba liña eletrisidade no iha tempu hanesan kontinua kedas viajen ba Suku Gisu-Loes, Postu Administrativu Maubara, hamutuk ho autoridade sira fahe mós foos ba povu kbiit-laek na’in-50.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here