Lider Karizmátiku, Kay Rala Xanana Gusmão kaer liman ho Bispu Dioseze Maliana, Don Norberto Amaral. Imajen/Eugénio Pereira

BOBONARO, 16 juñu 2020 (TATOLI)- Prezidente Konferénsia Episkopál Timorense nu’udar mós Bispu Dioseze Maliana, Mgr. Norberto Amaral,  ohin, iha bispu nia rezidénsia iha Suku Ritabou, hasoru malu lider karizmátiku, Kay Rala Xanana Gusmão, hodi ko’alia preparasaun no ajenda selebrasaun tinan-10 Dioseze Maliana ne’ebé sei hala’o iha loron 19 juñu 2020.

Notísia Relevante : Don Norberto Husu Deputadu Tau Sés “Egoízmu” Husu Deskulpa Ba Povu

Xanana ho Don Noberto Amaral halo enkontru iha bispu nia rezidénsia iha Suku Ritabou, tersa (16/06/2020). Imajen/Eugénio Pereira

“Ha’u konvida maun Xanana mai ami atu selebra tinan-10 prezensa Dioseze Maliana, tanba loron 20 juñu agora mós maun Xanana nia tinan, tanba ne’e aproveita tempu ha’u fó kedas votu parabéns, tanba maske katuas ona, nia la’o sosializa nafatin prevensaun COVID-19 ba povu sira no konsolida nafatin pás iha rai-laran no iha rai-li’ur,” hateten Don Norberto Amaral, hafoin hasoru malu ho Xanana Gusmão.

Iha selebrasaun tinan-10 Dioseze Maliana nian ne’e, Igreja rasik forma ona komisaun organizadora ida envolve padre, madre no sarani parókia hotu iha Bobonaro atu halo misa agradese ba Maromak hodi tulun nafatin sarani no povu Timor-Leste.

Iha parte seluk, Don Norberto Amaral, dehan too agora nia parte seidauk deside atu halo prosesu konstrusaun ba Igreja Katedrál Maliana, tanba sei hadi’a lai problema interna iha Igreja Katólika hotu foin bele koordena ho Governu hodi harii Igreja ne’e.

Don Noberto fó sasin katak agora povu Maliana liu-liu, Suku Ritabou nia hakarak maka Governu bele ajuda hadi’a lalais estrada no ponte liga husi Ritabou ba Eskola Koléjiu, Aldeia Maahui, Daitete ho Rituudo.

“Se governu laran luak hakarak halo estrada ne’e halo ba, se lakohi halo Maromak fó ita nia kakutak atu bele hakat liu mota hamutuk ho povu sira-ne’e buat baibain ona,” hateten Don Norberto Amaral ho hamnasa.

Iha fatin hanesan, Xanana  orgullu tebes bele hetan konvite husi Bispu Maliana, tanba iha tinan kotuk Bispu rasik konvida nia hodi partisipa ona iha serimónia inaugurasaun rezidénsia Bispu nian iha Maliana.

Xanana ho Bispu Noberto ko’alia  mós oinsá buka koordena ho Governu atu hadi’a ponte no estrada husi Suku Ritabou ba rezidénsia bispu nian too eskola Koléjiu, Aldeia Maahui, Daitete ho Rituudo.

“Iha  loron 19 juñu 2020, Dioseze Maliana halo tinan-10, tanba aproveita vizita ne’e husu ba amu atu haree oinsá bele buka hadi’a estrada ne’ebé sei aat, tanba udan tau mai koitadu, amu hela de’it iha prizaun ne’e labele sai,” dehan Xanana.

Xanana mós sei halo esforsu  koordena ho Governu atu buka mekanizmu oinsá hadi’a estrada no ponte ne’e.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here