Xanana hasoru Bispu Dioseze Maliana, Mgr. Noberto Amaral, iha Maliana, tersa (16/06/2020). Imajen/Eugénio Pereira

BOBONARO, 16 juñu 2020 (TATOLI)- Bispu Dioseze Maliana, Mgr. Norberto Amaral,  husu ba membru Parlamentu  Nasional  iha V Lejizlativa ne’e atu tau sees sira nia “egoízmu” polítika hodi husu deskulpa ba povu Timor-Leste.

Notísia Relevante : PN Sei Husu Bispu Fó Bensaun ba Meza Foun

Prezidente Konferénsia  Episkopál Timorense, Don Norberto Amaral, afirma Igreja sei la partisipa serimónia rituál atu harii hikas meza Parlamentu Nasionál, bainhira distintu  Deputadu sira la husu deskulpa ba povu.

Igreja Katólika rasik, tuir Don Norberto, sente triste tebes bainhira akompaña problema entre membru Parlamentu Nasionál hodi  rahun meza  Uma Fukun Parlamentu Nasionál nu’udar asaun ida ne’ebé loloos la merese atu akontese iha nasaun demokrasia  ne’ebé harii husi povu tomak nia terus.

“Ha’u hanoin Parlamentu Nasionál tenke husu lai perdaun ba povu ba hahalok ne’e, povu ne’e hakarak buat di’ak, la’ós ba baku fali meza rahun, de’ut malu iha ne’ebá, ne’e la’ós povu nia hakarak. Sira (deputadu) tenke rekoñese sira-nia aan ne’e sala. So hanesan ne’e mak Igreja bele ba, selae para tiha o nia buat ida parlamentu ne’e atu halo saida. Bilaperlu sira husu deskulpa hakne’ak, tanba povu maka haruka sira ba iha ne’ebá, ha’u ko’alia maka’as uitoan para sira rona,” afirma Don Norberto Amaral, ohin, hodi responde ba jornalista iha nia rezidénsia, Suku Ritabou, Maliana.

Ho triste, Don Norberto Amaral  husu atu Deputadu ho fee tenke husu deskulpa ba povu, tanba Parlamentu nu’udar órgaun soberania daruak ne’ebé reprezenta povu tomak hodi ukun tuir Konstituisaun RDTL.

“Ha’u husu ba lider sira ne’e ho haraik aan tebetebes atu kaer konstituisaun didi’ak tuir karta pastorál ne’ebé ami fó sai tiha ona. Simples tebes konstituisaun sai nu’udar bíblia atu leno ita nia hahalok iha Timor-Leste ida ne’e. Se ita haksoit liuhusi konstituisaun, ita la hatene atu ba loos ne’ebé no halo ita konfuzaun boot, ita kaer Konstituisaun nu’udar bíblia atu ordena  ita nia aktu no ita nia hahalok hotu iha Timor-Leste,” Don Norberto Amaral hateten.

Ierarkia Igreja Dioseze Dili, Baucau ho Maliana, hatudu ona sira nia asaun hodi husu nafatin ba Lider rezisténsia, Kay Rala Xanana Gusmão, Taur Matan Ruak, Francisco Guterres “Lú Olo” ho Mari Alkatiri atu tuur hamutuk hakotu impase ida-ne’e.

“Ha’u nia espetativa ba situasaun atuál ida ne’e mak ne’e, ita interpreta ita nia hahalok sira ne’e tuir konstituisaun, orasida ami (Igreja) tama liubá, ema dehan ida ne’e polítika, ida ne’e besik liu Xanana, ida ne’e besik liu Alkatiri, maibé ha’u la besik ba ema ida, ha’u nu’udar Igreja ba Alkatiri, Taur mós di’ak sira ne’e lider istóriku ba sarani sira mesak di’ak hotu,” tenik Don Norberto.

Nia hatutan, bainhira situasaun polítika ne’e la rezolve, povu maka sei sai vítima no afeta mós ba roda ekonomia nasaun nian.

Jornalista   : Eugénio Pereira

Editór        : Francisco Simões

1 KOMENTÁRIU

  1. V lejislatura la’ós “V Lejislativa”
    ‘Lejislatura’ dura tinan 5 no fahe ba,
    ‘Sesaun Lejislativa’ 5, no idaidak dura tinan1.

HAKEREK NO HATÁN

Please enter your comment!
Please enter your name here