Aniceto Guterres, Prezidente Parlamentu Nasional. Imajen/Antonio Goncalves

DILI, 03 juñu 2020 (TATOLI)–Prezidente Parlamentu Nasionál (PPN), Aniceto Longuinhos Guterres Lopez, hateten Meza Parlamentu Nasionál (PN) forma ona komisaun atu prepara serimónia rituál kulturál ba hatuur hikas meza, inklui sei ko’alia ho bispu atu delega padre ruma hodi fó bensaun ba meza ne’e.

Notísia Relevante: Meza PPN Ne’ebé Rahun Sei Hatuur Hikas Liuhosi Serimónia Rituál

“Meza PN forma ona komisaun atu prepara ba serimónia rituál ne’e. Se meza ida rahun ne’e klaru katak tenke halo meza foun ida, nune’e prezidénsia ho komponente meza tomak bele okupa fatin  ida iha ne’ebá hanesan baibain,” dehan Aniceto Longuinhos Guterres Lopez ba jornalista sira hafoin lidera kompozisaun meza foun PN hasoru malu ho Prezidente Repúblika, Francisco Guterres “Lú Olo” iha Palásiu Prezidensiál Nicolau Lobato, Bairru Pité, Dili, kuarta ne’e.

Kona-ba rituál sira, nia hatutan, sei halo tui  kultura Timor nian maibé la’ós fasil, tanba ne’e  tenke la’o tuir ninia regra.

“Entaun, ne’e sei lori tempu uitoan, maibé ami inisia ona hodi halo preparasaun no sei taka ho rituál kulturál no mós rituál relijiozu. Sei iha rituál relijiozu ninian, ami sei ko’alia ho Amu Bispu atu nune’e bele hatudu Padre pároku ruma, atu bele fó bensaun hafoin serimónia kultural ne’e,” nia hateten.

Antes ne’e, meza Prezidente Parlamentu Nasionál rahun no baku fila iha loron 19 fulan maiu tinan 2020, hafoin bankada Parlamentár FRETILN, PLP ho KHUNTO hatama pedidu rekerimentu ba Prezidente Parlamentu Nasionál, sesante Arão Noé de Jesue da Costa Amaral, nune’e mós karta seluk atu insiste Arão tenke ajenda votasaun ba pedidu destituisaun ne’e, maibé Arão rezeita pedidu ne’e no mentein hein Prezidente Repúblika Francisco Guterres “Lú Olo” halo disolusaun ba PN.

Ho pedidu ne’ebé rejeita hosi PPN, mak bankada FRETILIN, PLP ho KHUNTO hatama tan pedidu ida ba vise-Prezidente Maria Angelina Sarmento no Luis Roberto atu lidera meza, maibé tanba bankada CNRT lakohi, nune’e mosu dezintedimentu, haksesuk malu to’o meza Parlamentu Nasionál baku fila.

Notísia Relevante: Deputadu CNRT Baku-Fila Meza Prezidente Parlamentu Nasionál

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here