DILI, 16 juñu 2020 (TATOLI)–Autoridade Lokál hosi Suku Vila-Maumeta, Postu Administrativu Ataúro, Munisípiu Díli, hato’o agradese ba Estadu Timor-Leste liuliu Governu ne’ebé ho inisiativa oferese subsídiu $200 ba kada uma-kain iha territóriu tomak, espesialmente iha Suku Vila -Maumeta hodi bele sustenta moris durante Estadu Emerjénsia.
Notísia Relevante: Semana Oin, Administradór Ataúro Sei Submete Relatóriu ba Governu
Xefe Suku Vila-Maumeta, Filipe Ximenes, lori komunidade nia naran hato’o obrigadu ba Estadu liuliu Governu ne’ebé fó apoiu ba populasaun sira iha ninia suku ne’ebé enfrenta menus ai-han kauza hosi Coronavirus (COVID-19) iha situasaun Estadu Emerjénsia.
“Hanesan autoridade komunitária iha Suku Vila-Maumeta, lori komunidade nia naran hakarak hato’o ami-nia obrigadu ba Estadu liuliu Governu ne’ebé fó apoiu ba populasaun iha Timor laran tomak liuliu iha ha’u nia suku, ne’ebé enfrenta menus ai-han kauza hosi Coronavirus no mós Estadu Emerjénsia durante fulan rua nia laran,” dehan Xefe Suku Vila-Maumeta, Filipe Ximenes, ba Agência TATOLI liuhusi telefónika, tersa ne’e.
Xefe suku ne’e iha esperansa no garante katak, ho apoiu ne’ebé iha, ninia populasaun bele rezolve no rekopera duni iha situasaun hamlaha tanba menus ba ai-han ne’e.
“Osan $200 ne’e mai duni to’o ha’u-nia povu nia liman. Ha’u hein katak, ha’u-nia povu bele sosa hahan hodi bele han,” nia hateten.
Nia hatutan, tuir lista aprovadu hosi Suku Vila-Maumeta, iha família hamutuk 433 ho valór osan hamutuk $86.600.
“Husi osan ne’e, ita selu ona família 414 ho pagamentu osan hamutuk $82.800 no iha família 19 mak ita seidauk selu ho osan restu hamutuk $3.800,” Xefe Suku ne’e hateten.
Nia mós informa, provizoriamente iha lista ne’ebé iha, família 12 mak halo reklamasaun no autoridade lokál hamutuk ho ekipa pagamentu buka rezolve oinsá bele hatama iha pagamentu períodu tuir mai.
Iha suku ne’e mós iha família hamutuk na’in-13 ne’ebé kada fulan simu saláriu liu $500 no iha na’in tolu (3) mak naran aprovadu hotu atu hetan subsídiu maibé ho voluntariamente aprezenta aan hodi lakohi atu simu subsídiu ne’e.
Entretantu, Xefe Aldeia Iletikaraquia, Suku Vila-Maumeta, Carlos da Carmo, fó obrigadu ba Governu tanba ninia populasaun iha aldeia ne’e bele hetan subsídiu hosi Governu.
Nia hateten, populasaun iha aldeia ne’e antes ne’e enfrenta duni menus ai-han, la’ós de’it tanba Estadu Emerjénsia maibé tanba mudansa klimátika.
“Ha’u fó obrigadu tanba ha’u-nia populasaun bele hetan subsídiu ida-ne’e. Ha’u-nia populasaun enfrenta menus ai-han iha situasaun rua. Ida, tanba Estadu Emerjénsia no mós mudansa klimátika,” nia hateten liuhosi telefónika.
Antes ne’e, Administradór Postu Administrativu Ataúro, Mateus Belo hateten, lista naran ne’ebé aprovadu hosi Postu Administrativu Ataúro hamutuk 2.682 no sira ne’ebé simu ona subsídiu hamutuk 2.536 ho orsamentu $507.200.
Notísia Relevante: Ataúro Finaliza Ona Pagamentu Subsidiu $200 ba Uma-Kain
Jornalista : Cipriano Colo
Editór : Cancio Ximenes
