Komunidade sira bainhira forma hodi simu ona subsidu $200 ne'ebe Governu fo tanba implementasaun Estadu Emerjensia durante fulan rua relasiona ho Coronavirus, Imajen/Antonio Goncalves.

DILI, 12 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Expostohateten, ohin, Postu Administrativu Ataúro finaliza ona pagamentu subsídiu $200 ba uma-kain.

Nia hatutan, aban, ekipa pagamentu sira regresa fila mai no bainrua sira sei dezloka ba fatin hirak ne’ebé mak ho nia benefisiáriu barak liu. Nune’e, nia dehan, nafatin asegura prosesu pagamentu hodi bele finaliza tuir data ne’ebé mak kalendáriu ne’ebé mak Governu deside ona.

Notísia Relevante: Governu Esforsu Finaliza Pagamentu Subsídiu $200 iha Loron 14 Nia Laran

“Tuir informasaun, ohin, Postu Administrativu Ataúro bele finaliza ona ninia prosesu pagamentu. No, aban sira regresa fila mai, nune’e bainrua sira bele suporta fali ba suku seluk ne’ebé mak ho nia benefisiáriu barak liu,” dehan Rui Manuel Gago Exposto ba jornalista sira iha Salaun MSS, Caicoli, Dili, sesta ne’e. 

Aleinde ne’e, nia informa, iha Munisípiu Ermera mós iha nia suku balun ne’ebé mak besik atu finaliza ona, karik sei aumenta ekipa pagamentu sei tulun fali suku sira seluk iha Ermera hodi aselera prosesu ne’e tomak.

“Ha’u orienta ona sira katak suku ne’ebé mak finaliza ona, husu para atu suporta fali suku ne’ebé mak seidauk hotu, atu nune’e ita bele aselera lalais ita-nia prosesu pagamentu ne’e ramata tuir data ne’ebe Governu termina,” diretór jerál ne’e haktuir.

Tuir nia, iha fatin seluk ne’ebe pagamentu seidauk ramata tanba razaun iha benefisiáriu barak no mós tanba ekipa apagamentu ema nain-ida iha suku ida entaun difikulta prosesu pagamentu ninian.

“Ami nota problema barak iha Munisípiu Dili, tanba benefisiáriu barak mak antrian. Iha Dili, benefisiáriu hamutuk uma-kain 64.913 ho ninia atendementu mós lentu uitoan. Tanba, kada suku ekipa pagamentu ema ida de’it, nune’e hodi difikulta iha prosesu pagamentu nian,” nia hateten.

Tanba ne’e, nia husu ema hotu nia komprensaun tanba pagamentu ida-ne’e uza sistema ida-ne’ebé mak tenke liuhosi koridór ida no presiza kuidadu iha prosesu pagamentu subsídiu $200 ne’e.

“Ho ida-ne’e, ha’u husu komprensaun hosi komunidade katak tanba ita tama iha sistema ida, ita tenke la’o tuir koridór tanba osan ne’e povu nian.  Entaun ita asegura mós osan ne’e merese duni ba ema ne’ebé mak merese atu simu. Tanba, ami halo rejistu ida ho kuidadu para labele falla iha relatóriu,” nia dehan. 

Tuir dadus, iha Postu Administrativu Ataúro, uma-kain 2.600 (rihun rua atus neen) hosi suku haat ne’ebé sai hanesan benefisiáriu hodi simu subsídiu $200 ne’e.  

Jornalista : Osória Marques

Editor      : Cancio Ximenes

HAKEREK NO HATÁN

Please enter your comment!
Please enter your name here