Prezidente RAEOA-ZEESM,TL, Arsénio Paixão Bano. Imajen/Egas Cristovão

DILI, 15 juñu 2020 (TATOLI)–Prezidente Autoridade Rejiaun Administrativa  Espesiál Oé-Cusse Ambeno (RAEOA), Arsenio Paixão Bano, hateten Prezidente Repúblika (PR), Francisco Guterres “Lú Olo”, fó konfiansa tomak ba nia atu lidera RAEOA no husu ba nia atu sai Prezidente ba povu Oé-Cusse tomak.

Arsénio Bano hato’o lia hirak ne’e, hafoin hala’o audiénsia ho Prezidente Repúblika, iha Palásiu Prezidensiál Nicolau Lobato, Bairru Pité, Dili.

Notísia Relevante: PM Taur Husu Atoni-Oan Hamutuk ho PA RAEOA Foun Dezenvolve Oé-cusse

“Prezidente Repúblika hato’o ninia konfiansa tomak ba ha’u no mós hato’o kumprimentu ba povu Atoni. Ha’u mós hato’o ba Prezisdente Repúblika kona-ba prioridade balun ne’ebé presiza halo iha tempu badak, nune’e Oé-Cusse labele tarde ho inisiativa sira Governu nian. Ezemplu, hanesan pagamentu subsidiu $100. Prezidente Repúblika husu ba ha’u atu servisu didi’ak, sai Prezidente ba populasaun Oé-Cusse tomak. Servisu tuir regra, servisu ho fuan. Ha’u hateten ona katak sai Prezidente ba Oé-Cusse ne’e la’os fasil,” Arsenio Bano hateten ba jornalista sira, segunda ne’e. 

Antes ne’e, Primeiru-Ministru, Taur Matan Ruak, iha sesta (12/06) fó pose ba eis Sekretáriu Rejionál Autoridade Rejiaun Administrativa Espesiál Oecusse-Ambeno (RAEOA), Arsénio Paixão Bano, nu’udar Prezidente foun RAEOA hodi troka nia antesesór José Luís Guterres “Lugu” ho baze iha Rezolusaun Governu Nú.20/2020, loron 10 fulan Juñu.

Nomeasaun no ezonerasaun Prezidente Autoridade RAEOA nu’udar prerogativa Governu nian ne’ebé mak atribui hosi Lei Nú.3/2014, loron 18 fulan Juñu, alteradu hosi Lei Nú.nu.3/2019, loron 19 fulan Agostu, nune’e Governu liuhosi Konsellu Ministru iha loron 10 fulan Juñu 2020, deside ezonera José Luís Guterres no nomeia fali Arsénio Paixão Bano. 

Antes ne’e mós Xefe Governu Taur Matan Ruak hateten, ezonerasaun ba José Luís Guterres hosi kargu Prezidente Autoridade RAEOA, nu’udár konsekuénsia hosi konjuntura polítika foun ne’ebé akontese iha Parlamentu Nasionál no ne’e hanesan prosesu normál iha Estadu direitu demokrátiku.

Notísia Relevante: PA RAEOA Husu MSSI Aselera Pagamentu Subsídiu ba Povu Oé-Cusse

Jornalista : Cipriano Colo

Editór      : Cancio Ximenes

1 KOMENTÁRIU

  1. Nesesidade neebe Oportunu tebes ba OEKUSI OAN atu bele hariku mandatu Sira no Orgullho ba Sistema Politika foun neebe iha Ona amandmentu. Biban agradese ba Governu sentral katak buat Hotu Lao kondisional tebes atu aprofundamentu ba sesaun Hotu. Hakait hosi Nomeasaun Foun ba PA foun Ami konsdera validity tebes ba OEKUSI Naleok. ..tanba Buat Hotu hanesan alkansaun Diak mai Ami sosiedade OEKUSI atu koalia direita hanesan Lian materna neebe nanis Ona Ami Atoni Moris hosi.maibe persiza atu sugere deit ba governu Sentral katak auditoria neebe Ekipa halao hosi infrastrutura no partes Hotu iha implementasaun karik liga ba RH. DALAN, INVESTIMENTU Sira ba Produtividade karik habiban iha depois Programa Sentral liuu hosi Ministerio Sira tenke halo audit bebeik atu Suporta Ami nia PA FOUN hodi fortifika Makina regional ba Fundamentu sufisiente kalsifikasaun Ekonomia RAEOA no sai targetu ba Ekonomia iha Nasional Income (NI) tanba Kestaun nee ita tenke Taneee-as ba Povu Nia movimentasaun Moris iha loron loron.
    Apresia no Vemvindo ba PA FOUN.

HAKEREK NO HATÁN

Please enter your comment!
Please enter your name here