Komísariu CAC, Sergio Hornai. Imajen/Egas Cristóvão

DILI, 15 juñu 2020 (TATOLI)-Durante halo ‘eskolta’ ba ezekusaun pagamentu subsídiu $200 ba kada uma-kain iha territóriu nasionál, ekipa  Anti-Korrupsaun, deteta no rejista keixa 50-resin kona-ba irregularidade iha prosesu pagamentu.

Notísia Relevante : Loron Daneen, Benefisiáriu 173.186 Simu Ona Subsídiu

Ekipa anti-korrupsaun ne’e kompostu husi Komisaun Anti-Korrupsaun (CAC), Provedoria Direitu Umanu no Justisa (PDHJ), Inspektór Jerál Estadu (IGE), Komisaun Funsaun Públika (CFP) no rede sosiedade sivíl (Forum ONG Timor-Leste, Judicial System Monitoring Program no seluk tan).

Komisáriu CAC Sergio Hornai, informa liuhusi konferénsia imprensa, ohin, iha edifísiu CAC, faról, Dili, katak ekipa anti-korrupsaun halo akompañamentu no monitorizasaun direita iha terrenu ba proses pagamentu apoia monetáriu agregadu família ho valor $200, husi loron 09 to’o 13 juñu, tinan ne’e, iha irregularidade no keixa 50-resin.

Mezmu Komisáriu CAC, Sergio Hornai, la konfirma detallu irregularidade sira ne’ebé akontese iha fatin ida-idak no komete husi se, maibé nia afirma katak irregularidade ne’ebé ekipa anti-korrupsaun rejista no deteta iha poténsia risku sira hanesan korrupsaun, abuzu podér, kobransa ilegál, falsifikasaun dadus fixa familiar, ne’ebé involve direita husi autoridade lokál balun.

Irregularidade sira-ne’e, hateten Sergio Hornai, akontese iha suku no aldeia balun husi Munisípiu Dili, Manatuto, Ermera, Liquiça, Aileu, Ainaro, Baucau, Bobonaro, Manufahi ho Viqueque.

Liuhusi konferénsia imprensa ne’ebé akompaña mós husi Provedora PDHJ ho Inspektór Jerál Estadu ne’e, Sergio Hornai, relata katak ekipa anti-korrupsaun halo kedas intervensaun iha terrenu ho forma pasifikamente liu-liu ba maneira prevensaun nian atu limita labele iha expansaun boot.

“Ita halo esklaresimentu komprensivu nune’e benefisiáriu labele aproveita situasaun hodi hetan benefísiu ba aan no nu’udar sidadaun ho onestu atu kontribui,” hateten Sergio Hornai.

Ekipa anti-korrupsaun mós halo koordenasaun ho ekipa pagamentu husi Ministériu Solidariedade, Sosiál no Inkluzaun (MSSI) no parte sira atu ajusta dadus benefisiáriu sira-nian ho situasaun sira-ne’e.

Komisáriu CAC, Sergio Hornai, alerta nafatin ba autoridade no komunidade hodi evita aktu sira ho situasaun sira-ne’e atu bele garante ezekusaun pagamentu  la’o ho transparente no kontabilidade tuir alvu.

Jornalista       : Nelson de Sousa

Editór             : Francisco Simões

 

HAKEREK NO HATÁN

Please enter your comment!
Please enter your name here