Komísariu CAC, Sergio Hornai. Imajen Tatoli/Egas Cristóvão

DILI, 15 juñu 2020 (TATOLI)-Komisaun Anti Korrupsaun (CAC) sujere ba Governu liuhusi Ministériu Justisa atu prioritiza prodús ezbosu lei krime sibernétika la’ós halo lei kriminaliza difamasaun.

Notísia Relevante : PM Taur Fó Tempu ba Sosiedade Diskute Lei Kriminaliza Difamasaun

Lei krime sibernétika ne’e mak bele regula oinsá ema utiliza rede sosiál no meiu internet ba buat di’ak. La’ós ba tolok fali ema, insultu no halo diskursu ódiu iha rede sosiál, inklui mós bele regula aktu krime liuhusi meiu internet, hanesan tranzasaun droga, trafficking umanu no mós ameasa internu ho esternu ne’ebé ema bele utiliza husi plataforma internet.

Komisáriu CAC, Sergio Hornai, hateten, governu iha kompeténsia própriu atu elabora ka prodús ezbosu lei, maibé lei sira ne’ebé atu elabora tenke refleta ba espíritu konstituisaun nu’udar estadu direitu no demokrátiku.

Responde jornalista sira liuhusi konferénsia imprensa, ohin, iha edifísiu CAC, Faról, Dili, Komisáriu Sergio Hornai,  fó hanoin atu Governu presiza konsultasaun ida ne’ebé komprensivu hodi hetan informasaun ida detallu kona-ba ezbosu lei kriminaliza difamasaun.

CAC mós prefere atu Governu tau prioridade mais urjente ba iha prevensaun COVID-19 nune’e mós ba iha lei anti-korrupsaun ne’ebé tinan barak ona kaduka hela iha Parlamentu Nasionál.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here