Dadur sira iha Prizaun Becora. Imajen/dok.espesiál

DILI, 15 juñu 2020 (TATOLI)-Diretór Prijaun Becora Dili, João Domingos, informa durante tinan 2019 to’o 2020, dadur hamutuk 180 maka fó ona doasaun ran ba Banku Sangue Nasionál HNGV hodi oferese ba pasiente ne’ebé maka presiza ran.

Tuir relatóriu hahú fulan-abríl 2019 iha dadur hamutuk 94 maka fó doasaun ran, depois iha novembru iha tan dadur ema na’in 41.

”No iha fulan-marsu tinan 2020 ami halo tan doasaun ran hamutuk ema na’in 45 entaun totál hamutuk 180 ,” relata João Domingos ba jornalista sira bainhira partisipa komemorasaun loron mundiál ran ne’ebé hala’o iha HNGV, Dili ohin.

Notísia Relevante:TL Komemora Loron Mundiál Doasaun Ran,OMS Kompromete Tulun HNGV

Objetivu husi doasaun ran ne’e maka atu salva pasiente ida nia vida bainhira presiza tebes ran turuk ida. Tanba ne’e Prijaun Becora sei kontinua organiza dadur sira atu oferese tan ran ho voluntariamente ba HNGV iha futuru.

”Entaun husi ida ne’e mak sosiedade sira fó fiar ba ita-nia dadur sira katak hahú ona hadi’a sira-nia komportamentu iha sosiedade nia leet liuhusi doasaun ran hodi ajuda ema seluk ne’ebé mak presiza ran turuk ida hodi salva moris,” tenik tan.

Durante ne’e dadur sira oferese ran ba Banku Sangue Nasionál regularmente iha komemorasaun loron boot sira hanesan 20 maiu no 28 novembru kada tinan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here