Komunidade halo doasaun raan iha BNS, ONGV, iha ámbitu selebrasaun loron mundiál ba doasaun raan. Imajen António Gonçalves

DILI, 16 juñu 2020 (TATOLI)-Governu liuhosi Ministériu Saúde hamutuk ho Organizasaun Mundiál Saúde (OMS), segunda ne’e komemora loron mundiál doasaun ran ho tema mundiál maka ran seguru salva moris fó ran no halo mundu sai fatin saudavel liu.

Mundu tomak komemora Loron mundiál doasaun ran ne’e iha loron 14 fulan-juñu, maibé ba Timor-Leste foin komemora ohin tanba data komemorasaun ne’e monu iha domingu, horiseik.

Reprezentante, OMS iha Timor-Leste, Rajesh Pandav, kompromete  sei fó nafatin apoiu ba Banku sangue Nasionál HNGV  liliu apoiu tékniku no lojístika ba estabelesimentu Komisaun Konsultivu Nasionál Banku Sangue Nasionál.

“OMS kontinua komprometidu hodi fó apoiu tomak ba Banku Sangue Nasionál hodi atinje sira-nia meta atu nunee laiha Timoroan ida mak sofre ka lakon nia moris tanba problema  ran,”katak Rajesh Pandav, iha HNGV, ohin.

Tuir dadus OMS nian katak pursentajen populasaun iha Timor-Leste seidauk iha konsiensia  atu fó doasaun ran gratuita ba Banku Sangu Nasionál bainhira akontese estoke ran menus.

“Maioria doasaun raan (pursentu hitu nulu (70%)) simu hosi família ka doadores ne’ebé selu,”nia esplika.

Tanba ne’e, HNGV hamutuk ho Ministériu Saúde presiza hasa’e konsensia komunidade liuhosi programa sensibilizasaun informasaun ba populasaun para bele kontribui ran barak liutan hodi salva ema nia vida iha futuru.

Iha biban hanesan Ministra Saúde, Odete Maria Freitas Belo, hateten doasaun ran importante atu salva pasiente ida nia vida.

”Tinan-tinan ita komemora loron mundiál doasaun ran tanba ita hakarak fó informasaun nafatin no alerta ba ita-nia komunidade ba ita rasik katak importante tebes fó kontribuisaun liliu ba ran nian ba ita-nia pasiente sira ne’ebé mak presiza ran,”tenik Odete.

Durante serimonia komemorasaun ne’e, Banku Sangue Nasionál HNGV distribui mós sertifikadu apresiasaun ba Instituisaun Públiku, privada no pesoál sira hanesan Cruz Vermelha Timor-Leste (CVTL), Seminariu Fatumeta , Prizaun Becora Sols, inklui Igreja Protestante Timor Leste.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here