Xanana Gusmão tau ai-funan hodi presta omenajen ba família Saudozu Prezidente Nicolau Lobato, ne’ebé mate durante funu iha Semitériu Suku Leorema, sábadu (13/06/2020). Imajen/Eugénio Pereira

BAZARTETE, 13 juñu 2020 (TATOLI)- Lider Karizmátiku, Kay Rala Xanana Gusmão, sábadu ne’e, hala’o vizita ba Suku Leorema, Postu Administrativu Bazartete, Munisípiu Liquiça, ho intensaun atu halo asaun solidariedade ba populasaun kbiit-laek sira iha Saudozu Prezidente Nicolau Lobato nia knua ne’e.

Notísia Relevante : Loron Eroi Nasionál: Nicolau Lobato Mak Povu Nia Lider

Molok halo asaun solidariedade, Xanana ho nia komitiva hamutuk ho komunidade Leorema, presta omenajen ba Saudozu Prezidente Nicolau Lobato ho nia família hamutuk na’in-80 ne’ebé mate tanba funu hodi defende povu Timor-Leste nia liberdade no nia independénsia ne’ebé proklama ona iha 28 novembru 1975.

Prezensa Xanana nian iha Leorema no vizita ba semitériu Leorema akompaña mós husi Virginia Araújo Soares ,espoza Rogério Tiago Lobato, hodi kari ai-funan no sunu lilin ba Saudozu Nicolau Lobato nia aman, Narcio Manuel Lobato, Felismina Alves Lobato no inklui família Lobato sira seluk tan.

Reprezentante família Lobato, Amelia dos Santos Lobato, hato’o agradese tebes ho vizita Xanana nian ne’e, tanba bele marka tempu ona halo primeira vizita ba Leorema durante Timor restaura nia independénsia, 20 maiu 2002.

“Ami família Lobato agradese tebes, primeira vés Maun Xanana mai presta omenajen ba família Lobato sira ne’ebé mate ba rai ida ne’e,”  hateten Amelia  Lobato, ba jornalista iha semitériu Leorema.

Xanana Gusmão hato’o mensajen pás ba populasaun Suku Leorema, Postu Administrativu Bazartete, Munisípiu Liquiça, sábadu (13/06/2020). Imajen/Eugénio Pereira

Iha oportunidade ne’e, família Lobato husu ba lider Timor-Leste atu kontinua hamutuk hodi kria pás no dame atu lori nasaun ho povu ne’e ba moris di’ak.

Lider Karizmátiku, Kay Rala Xanana Gusmão, konsidera Saudozu Nicolau Lobato nu’udar jerasaun husi Suku Leorema, ne’ebé oferese nia vida tomak hodi lori Timor-Leste konkista ba ninia mehi naruk ba luta libertasaun nasionál.

Xanana dezafia foin sa’e Timor-Leste atu ba nati tuir prinsípiu luta saudozu Nicolau Labato nian no saudozu sira seluk nian ne’ebé mate ba rai ne’e atu kaer metin nafatin sira nia mehi hodi lori nasaun ne’e unidade no progresu.

Xanana dehan, vizita emosionál hodi hato’o mós mensajen ba juventude Leorema ne’ebé hamosu konflitu oho malu iha loron 4  jullu 2019, ne’ebé rezulta joven na’in-rua mate fatin, hodi sunu uma 13 atu labele akontese tan.

“Ha’u vizita munisípiu hotu, maibé vizita mai Leorema hanesan vizita mai rai-husar Nicolau Lobato nian, tanba ne’e, hahú husu ba joven Leorema sira lalika halo konflitu atu halo ferik no katuas sira ne’e terus tan, ho nune’e, maka ita bele valoriza Nicolau Lobato ho eroi tomak sira nia sakrifisiu luta,” Xanana Gusmão afirma.

Xanana husu atu joven sira labele kria konflitu, tanba bainhira joven sira kria beibeik konflitu sei hamoe Saudozu Nicolau Lobato nu’udar Leorema oan.

“Joven sira imi lalika baku malu, oho malu tan, selae imi hamoe Nicolau Lobato tanis hela iha ne’ebá, bainhira imi hanoin oho malu hela de’it, tanba imi labele fó ezemplu ba rai seluk. Iha rai-ida ne’e, imi tenke temi nafatin Nicolau Lobato hodi loke dalan ba imi, iha problema tuur hamutuk hodi ko’alia,” hateten  Xanana.

Xanana dehan vizita ba Nicolau Lobato nia moris fatin, la’ós atu halo polítika, maibé iha devér moral atu husu povu labele lakon esperansa, mezmu sira hasoru problema menus ai-han durante situasaun Estadu Emerjénsia.

“Ha’u mai iha Nicolau Lobato nia fatin, la’ós atu halo polítika, maibé atu husu imi joven sira lalika halo violénsia atu halo rai ne’e naran fo’er, tanba imi maka tenke sai ezemplu atu lori rai ne’e sai husi konflitu hodi hamorin rai no povu ida-ne’e hodi ita fó valór ba Nicolau Lobato nia luta,” Xanana tenik.

Xanana fó lembra, iha loron 31 dezembru maka Nicolau Lobato bolu nia ho Juvenal Inaçio, Sera Kay akompaña Nicolau Lobato ba Same.

Iha funu nia laran, Nicolau Lobato ho forsa hakiduk ba Maubisi, tanba presaun funu boot tebes husi inimigu.  Hahú ona husi tinan 1977 too 1978 mak inimigu kontrola tomak ona populasaun, minutu ikus, iha loron Nicolau Lobato bolu Xanana hodi fó orden ba membru Comite Sentrál FRETILIN atu kontinua luta ba rejiaun hotu iha Timor-Leste.

Xanana nia prezensa iha Leorema simu ho rituál tradisionál ne’ebé hamulak husi lia-nain sira  akompaña husi populasaun hodi konsidera vizita Xanana Gusmão ba Leorema reprezenta ilas Saudozu Nicolau Lobato nian.

Llia-nain, Celestino Gonçalves ho Mateus Brito konsidera, Xanana maka kontinua obra Saudozu Nicolau Lobato, hafoin saudozu mate ho “ultima bala, ha’u nia vitória” iha loron 31 dezembru 1978.

“Tinan barak, Nicolau Lobato liu ona, ita boot maka kontinua too ohin vizita fali mai Saudozu nia moris fatin hodi bele mai haree ami povu rai ne’e. ami simu ita no konsidera ita nia vizita ne’e espesiál tebes,” hateten Celestino Gonçalves ho Mateus Brito,  ho hamulak.

Iha fatin hanesan, Xefe Suku Loerema Sandra de Araújo Lobato ho tanis deklara, vizita Xanana ne’e importante tebes atu kontinua motiva joven sira, hakribit violénsia no perdua malu.

“Ha’u sente katak, vizita ofisiál ida ne’e priviléjiu tebes ba ami povu ida-ne’e, tanba problema konflitu ne’ebé akontese, foin lalais ne’e, halo ha’u nia komunidade susar tebes tanba problema menus ekonomia, no problema COVID-19 lori povu ne’e susar liu tan, la’ós ami la produtu,  maibé ho problema mudansa iklima halo ami nia povu nia produsaun kafé fuan komesa menus no folin mós la diak,”  Sandra de Araújo Lobato hateten.

Iha vizita ne’e, Xefe suku konvida Xanana halo mós vizita ba sede suku no haree kondisaun eskola balun ne’ebé aat  no menus fasilidade.

 Apoia Ai-han ba Kbiit-Laek 110

Lia-nain sira Suku Leorema simu prezensa Xanana nian iha Leorema, sábadu (13/06/2020). Imajen/Eugénio Pereira

Xanana ho Administradór Munisípiu Liquiça, Domingos da Coinceição, Veteranu Railos no autoridade suku, fó apoiu foos no mina ba povu kbiit-laek hamutuk 110 ne’ebe horik iha aldeia sira ne’ebé pertense ba Suku Leorema, hanesan  Aldeia Bukumera, Baura, Cutulau, Ergoa, Fatuneiro, Hato-Hou, Manu-Lete, Rai Lulik, Urema, Urluli.

Xanana dehan, apoiu ne’e oferese husi Timoroan laran luak nu’udar Emprezáriu Key Xavier ne’ebé ajuda ona foos, mina no sasán nesesidade báziku ba povu ne’ebé presiza liu.

“Ajuda ne’e ita nia Timoroan Key Xavier maka oferese, ami la’o haleu  Dili ba Ainaro too mai iha ne’e nia apoiu ho Timoroan sira seluk,” dehan Xanana.

Vizita ne’e hetan seguransa husi Komandu PNTL Liquiça ne’ebé lidera husi Adjuntu Komandante PNTL Liquiça, Superintendente Asistente Graciano Amaral, Komandante Batallaun Orden Públiku (BOP) Sarjentu Mateus Soares Cardoso.

Jornalista       : Eugénio Pereira  

Editór             : Francisco Simões

HAKEREK NO HATÁN

Please enter your comment!
Please enter your name here