Komandante Jerál PNTL, Komisáriu Faustino da Costa. Imajen/Antonio Goncalves

DILI, 03 juñu 2020 (TATOLI) – Komandu Polísia Nasionál Timor-Leste (PNTL) liuhusi desizaun Konsellu Superiór Polísia aprova no aprezenta ona lista naran  membru polísia na’in-ualu (8) ba Ministru Interiór no Ministru Defeza no Seguransa, Filomeno da Paixão de Jesus, atu foti desizaun hasai sira  husi Instituisaun PNTL.

Notísia Relevante : PNTL Kaer Ema Na’in-Tolu, Deskonfia Lansa Propaganda “Lorosa’e-Loromonu”

Komandante Jerál PNTL, Komisáriu Faustino da Costa, deklara membru sira ne’e komete  kazu krime grave ne’ebé ekipa Seksaun Justisa PNTL halo ona investigasaun kle’an hodi identifika sira-nia kazu konsidera viola lei no regra dixiplina PNTL nian.

Tuir regulamentu dixiplina PNTL no Komandante Jerál no Membru Konsellu Polísia tomak, la iha kompeténsia atu halo demisaun ba membru sira, nune’e Komandu aprezenta ba Ministru Defeza no Seguransa mak foti desizaun.

“Loos duni, iha semana ida liubá, Konsellu Superior Polísia liuhusi enkontru aseita ho maioria no propoin demisaun ba membru Polísia Nasionál Timor-Leste hamutuk na’in lima (5). Proposta demisaun ne’e, ami hasa’e ona ba Ministru Interior nia gabinete. Nune’e, PNTL liuhusi reuniaun Konsellu Superiór PNTL ba dala-rua ne’ebé hala’o Fevereiru 2020 propoin tan demisaun ba ema na’in tolu (3), no too iha maiu ikus nian, ami halo ona proposta demisaun ba membru PNTL hamutuk na’in-ualu (8),” hateten Komandante Jerál PNTL Faustino da Costa, ohin, ba jornalista, liuhusi konferénsia imprensa iha Komandu Jerál PNTL, Caicoli, Dili.

Membru sira ne’ebé sei hetan demisaun kompostu husi ajente polísia ho inisiál JAS ne’ebé lori pistola tiru kanek joven Isac dos Santos iha área Lebukoe, Aldeia Delesuvati, Suku Vaviquini, Postu Administrativu Maubara, Munisípiu Liquica, iha 30 abríl 2020.

Membru  PNTL seluk tan envolve iha kazu iha loron 18 novembru (Tinan la lembra), no balun envolve iha kazu iha loron 14 maiu 2014 kona-ba transfere mina husi karreta kompañia nian ba karreta seluk no membru seluk tan envolve iha kazu seluk ne’ebé Komandu PNTL labele fó sai sira nia identidade.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here