Imajen Tatoli/Egas Cristovão

DILI 01 juñu 2020 (TATOLI) – Ministériu Finansa (MF) liuhosi Sekretariadu Tékniku Komisaun Jestaun Fundu COVID-19 iha fin de semana ne’e, valida dadus no konklui ona transferénsia subsídiu uma-kain ba Banku Nasionál Komérsiu Timor-Leste (BCTL, sigla portugés), nune’e, Ministériu Solidaridade Sosiál no Inkluzaun (MSSI) bele fiksa kalendáriu hodi halo pagamentu ba faze dahuluk.

Transferénsia ne’e ho montante $59.623.800, ne’ebé korresponde ba pagamentu subsídiu fulan-rua hamutuk $200 ba kada uma-kain hamutuk 298.119 iha munisípiu 12 la inklui Rejiaun Administrativa Oé-cusse Ambeno (RAEOA), tanba daudaun MF seidauk simu dadus husi RAEOA.

Ministériu Finansa aselera hotu tiha no valida ona, oras ne’e MSSI nia parte sei hatun kalendáriu pagamentu no mós koordena ho BNCTL atu mobiliza osan ba munisípiu sira tanba ita-nia transferénsia ba diretamente konta Xefe Suku sira”, informa Vise-Ministra Finansa, Sara Lobo Brites, iha Sala Plenáriu, iha ámbitu debate kona-ba implementasaun medida ekonómika ho Membru Parlamentu Nasionál sira, segunda ne’e.

Vise-Ministra adianta, agora daudaun MF servisu hamutuk BNCTL inklui Banku Sentrál hodi loke sistema durante fin de semana.

Maski nune’e, Sara Lobo dehan MF sei hein atu prosesa tan dadus husi RAEOA, ne’ebé bainhira simu dadus kompletu pur volta uma-kain hamutuk 20.000, ne’ebé mak korresponde ho totál pagamentu subsídiu ba kada uma-kain fulan-rua hamutuk millaun $4-resin sei simu subsídiu iha faze daruak.

“Tuir orientasaun Primeiru-Ministru katak  prosesu pagamentu faze dahuluk ne’e, ba sira ne’ebé dadus tama ona iha Ministériu Administrasaun Estatál (MAE) liuhosi Xefe Suku no Xefe Aldeia sira, maibé ba sira ne’ebé seidauk simu iha faze dahuluk hein fali faze tuirmai”, nia salienta.

Antes ne’e, Governu liuhosi Konsellu Jestaun Fundu COVID-19 aloka ona orsamentu hamutuk millaun $63,6 hodi fó subsídiu $200 ba fulan-rua, ba kada uma-kain iha Timor-Leste hamutuk 318.302.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here