Kartaun CESLINK ne'ebé komesa sirkula iha Dili. Imajen Egas Cristovão

DILI, (TATOLI) – Ministru Reforma Lejislativa no Asuntu Parlamentár, Fidelis Leite Magalhães, hateten Governu liuhosi reuniaun Konsellu Ministru (KM) ohin halo análiza no aprova proposta investimentu operadór telekomunikasaun timoroan, Ceslink.

“Konsellu Ministru halo análize ida ba aprezentasaun husi operadór telekomunikasaun Ceslink, nu’udar kompañia nasionál no sira hakarak mai kompete iha área telekomunikasaun, konsellu ministru aprova sira nia partisipasaun iha área telekomunikasaun iha ita nia rai laran”, tenik ba jornalista sira hafoin reuniaun ezekutivu iha Palásiu Governu.

Investór konsórsiu Oka D’tel, Salvador Henrique Mauhoka. Imajen Egas Cristovão

Parte seluk investór konsórsiu Oka D’tel, Salvador Henrique koñesidu ho naran Mauhoka, hateten ohin nia ho ninia ekipa halo ona aprezentasaun ba Governu no hein desizaun husi ezekutivu sira.

“Ohin ami halo aprezentasaun Ceslink no Oka D’tel nian hanesan operadór telekomunikasaun, agora hein de’it rezultadu”, afirma.

Nia haktuir investimentu telekomunikasaun ne’e ho osan miliaun $21, halo faze rua. Ida milliaun $8, ami gasta ona milliaun $5 ba materiál sira, monta ona iha fatin-fatin hotu, hein operasaun.

“Antena ami monta kobre iha Dili laran hotu, ba distritu mak seidauk tanba prosesu ne’e tuir faze. Nune’e kuandu iha rezultadu ona husi konsellu Ministru, ami bele hala’o ona servisu”, dehan tan.

Parte hanesan Jerente Ceslink, Moniz Maia, akresenta investimentu ne’e iha kompañia rua, Ceslink hanesan operadór telekomunikasaun no Oka D’tel hanesan kompañia investór ne’ebé responsável husi Mauhoka rasik hanesan investór úniku ba estabelesimentu Ceslink iha Timor-Leste.

Nia dehan sira nia parte halo ona planu atu kobre teritóriu tomak mesmu agora hahú kobre de’it iha kapitál.

“Ami nia planu  iha roadmap (roteiru), prepara infraestrutura kleur liu tinan haat no lalais liu tinan rua, ne’e bele kobre ona munisípiu 13 maibé agora iha Dili laran infraestrutura ba telekomunikasaun prontu ona atu halo operasaun karik hetan ona aprovasaun husi Konsellu Ministru”, tenik.

Nia mós dehan karik iha ona desizaun bele ona hahú ona prosesu ho Autoridade Nasionál Comunikasaun (ANC) hafoin halo lansamentu.

“Sei hetan ona aprovasaun, ita mos sei hetan atribuisaun frekuénsia ho númeru telefone husi ANC. Husi ne’e mak prosesu lansamentu ofisiál, bele hein prosesu fulan ida ou rua hodi halo operasaun”, dehan tan.

Nia akresenta, operadór foun ne’e sei oferesse rede internet 4G LTE.

Entretantu, operadór Ceslink hanesan kompañia nasionál, kompostu husi Ceslink, empreza teknolojia informátika, no konsórsiu Oka D’tel, ne’ebé mak sei sai operadór telekomunikasaun dahaat iha Timor-Leste.

Ceslink rasik hakarak oferese servisu telekomunikasaun ne’ebé mak kualidade, fasil atu asesu no baratu, ho teknolojia modernu no efisiente hodi garante internet ho velosidade ne’ebé aas no ligasaun telefone iha área Timor laran tomak, nune’e mós garante seguransa informasaun konfidensiál komunikasaun nian.

Timor-Leste rasik, iha ona operadór telekomunikasaun hanesan Timor Telecom (TT) harii iha 2002, promove husi Portugal Telecom, Telkomcel harii iha 2012 husi Telekomunikasi Indonesia Internasional (Telin) no ikus liu Telemor harii iha 2013 husi Vietell Grobál ne’ebé hanesan grupu telekomunikasaun iha Vietname.

Jornalista: Julia Chatarina

Editora: Rita Almeida

1 KOMENTÁRIU

  1. Apresia Ba Inisitiva Timor Oan nian, Maun Mauhoka✊

    Maibe, sujere ba governu neebe tutela ba area Komunidade nian presiza iha hanoin ona atu bele Kria Rasik meiu telekomunikasaun Ida atu fasilita sidadaun hotu. Lamentasaun la signifika meiu telekomunikasaun iha Timor seidak too maibe nee hanesan estrategia Ida atu garante sirkulasaun Osan iha Rai laran no bele ona reduz Timor Oan kontribui Osan ba Rai liur Ida kada segundu Ida.
    Nunee bele konsidera hanesan sektor alternativu husi seitor petrolifera, ka atu Evita malisan rekursu ba Timor nebe nian fontes OGE depende Liu husi fundu minarai nian.
    Abraco.

HAKEREK NO HATÁN

Please enter your comment!
Please enter your name here