Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 12 juñu 2020 (TATOLI) – Sekertáriu Estadu Komunikasaun Sosiál, Merício Juvinal dos Reis ‘Akara’, hateten relasiona ho esbozu ba Projetu Lei Difamasaun ne’ebé inisia husi Ministériu Justisa, ne’e sei la hamate liberdade espresaun sidadaun sira nia tanba Governu sei garantia no prontu simu krítika.

“Esbosu Lei Kriminaliza Difamasaun laiha intensaun atu bandu liberdade imprensa liberdade espresaun tanba ita-nia Konstituisaun artigu 40 no 41 ne’e garantia no Lei Komunikasaun Sosiál mós garante ne’ebé Governu no Estadu ka’er ida-ne’e,” tenik Sekretáriu Estadu Akara iha Palásiu Governu, sesta ne’e.

Notísia Relevante: Kriminaliza Difamasaun Atu Eduka Sosiedade

Nia informa, idea kriminaliza difamasaun ne’e  promove husi Ministériu Justisa (MJ), maibé Konsellu Ministru mós seidauk diskute tanba sei presiza prosesu naruk hodi halo konsultasaun ho komunidade média, sosiedade sivíl no parte Igreja inklui sidadaun hotu hafoin lori ba Parlamentu Nasionál.

“Ita labele halo konkluzaun katak lei difamasaun ne’e atu bandu ema nia direitu, ne’e sedu liu tanba ne’e foin inisiativa hodi soe idea atu ita halo diskusaun,”nia subliña.

Ho  nune’e, Sekretáriu Estadu ne’e konsidera inisiativa lejizlasaun ne’e presiza kontribuisaun no ideia husi parte hotu, maibé di’ak liu halo karta eskrita hodi halo diskusaun di’ak no kle’an liután. 

“Ha’u hanesan Sekretáriu Estadu, garante ba  ita bo’ot sira (jornalista) katak laiha planu no intensaun polítika atu limite liberdade imprensa no espresaun. Tanba ne’e labele halo konkluzasaun sedu liu hodi julga dehan Governu ida-ne’e atu avansa ho ditadura tanba alerjia ho krítika sein rona esplikasaun detallu husi prosesu hirak ne’e,”  adianta SEComS Akara .

Nia afirma Governu só iha intesaun atu reforsa tan Liberdade imprensa no espresaun  liuhusi regula liberadade sira ne’e atu labele halo kanek fali ema seluk nian direitu.

“Ne’e normal tanba la’ós ita uza ita nia liberdade imprensa no espresaun atu depois ita duun matak ema, dez-kredita ema nia dignidade ne’e lei la dehan ida ne’e. Maibé Liberdade espresaun ne’e uza postivamente  hodi konstrui nasaun no Estadu no dezenvolvimentu  tuir dalan demokrasia, ne’ebé la’ós sebaliknya,” katak.

Governu sei asegura Liberdade impresa no espresaun hodi kumpre konstituisaun artigu 40 no 41 no lei komunikasuan sosiál ne’ebé ita boot sira servisu avontade.

“Ita nia Governu avontade atu simu Kritika, ita nia primeiru Ministru mós dehan bebeik katak kolega di’ak liu mak sempre fó Kritika, ne’ebe Governu la alerjia ho Kritika no Primeiru Ministru mós la bandu ema Kritika,”nia akresenta.

Tuir nia, intensaun husi kriminaliza difamasaun ne’e atu haree de’it ba ema sira ne’ebé duun matak ema, akuza ema sein faktu no seluk tan, maibé la taka dalan ba ema sira halo Krítika ho konstrutivu.

“Ha’u husu sosiedade sivíl, Igreja no komunidade mídia bainhira iha idea no avontade bele fó ba Ministériu Justisa hodi halo diskusaun, nune’e mídia bele kontinua servisu tuir kódigu étiku jornalis sira, tanba lei proteje ita bo’ot sira,” governante ne’e apela. 

Daudaun ne’e Sekertáriu Estadu Komunikasaun Sosiál no Ministériu Asuntu Parlamentár no Komunikasaun Sosiál dezenvolve hela Lei Radiodifizaun atu regula espesifikamente ba programa no notísia falsa nune’e bele garante mídia sira atu fó imformasaun ne’ebé loloos no kredível.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here