Imajen Tatoli/Osória Marques.

DILI, 09 juñu 2020 (TATOLI)–Governu liuhosi Vise Primeiru-Ministru Asuntu Solidaridade Sosiál no Inkluzaun (MSSI), Armanda Berta dos Santos, husu ba benefisiáriu sira ne’ebé mak nia saláriu $501 ba leten atu labele simu subsídiu $200 ne’e, tanba parte legal hatuur ona iha diploma ministerial.

Notísia Relevante: Governu Halo Abertura Ba Pagamentu Subsidiu $200 iha Sede Suku Comoro

Tanba, nia hatutan, iha diploma ministeriál konjunta hosi Minsitériu Solidariedade Sosiál no Inkluzaun (MSSI) no Ministériu Administrasaun Estatál (MAE) hateten ema ne’ebé rendimentu $500 mai kraik mak merese hetan no simu subsídiu hosi Governu.

“Ha’u sujere atu sira ne’ebé mak saláriu $501 ba leten ne’e di’ak liu lalika simu. Tanba, parte legal hatuur ona iha diploma ministeriál konjunta hosi MSSI-MAE, katak ema ne’ebé rendimentu $500 mai kraik mak merese hetan maibé sira ne’ebé mak liu $500 ne’e laiha direitu atu hetan subsídiu hosi Governu,”, dehan Ministra Solidaridade Sosiál no Inkluzaun (MSSI), Armanda Berta dos Santos ba jornalista sira iha Sede Suku Becora, Dili, tersa ne’e.

Aleinde ne’e, Vise Peimeiru-Ministra ne’e hateten mezmu prosesu pagamentu kleur maibé esforsu Governu to’o ohin loron bele nesesita ekonómia durante iha Estadu Emerjénsia ba COVID-19 nian.

Nia dehan, surtu COVID-19 lori impaktu boot ba problema sosiál, tanba ida-ne’e mak Governu prepara hodi realiza ohin. Nia infroma, MSSI mak implementadór ba programa ida ne’e, tanba ne’e mak presiza observa direta ba prosesu pagamentu iha Suku Becora no fatin seluk tan.

“Nu’udar implementadór ba subsídiu $200, presiza halo observasaun direta ba fatin hodi observa komunidade sira iha suku no iha fatin pagamentu sira iha Dili laran,” nia hateten.

Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here