Polísia kaer metin arguida soe bebé iha area Taibesi nian iha Tribunál Distritál Dili. Imajen/Domingos Piedade Freitas

DILI, 10 juñu 2020 (TATOLI) – Tribunál Distritál Dili (TDD) liuhusi juiz koletivu, kuarta ne’e, aplika pena prizaun tinan-haat (4) ba arguida Erlinda Barros, ne’ebé komete kazu soe bebé (Infantisídiu) iha tinan 2019.

Notísia Relevante : Suspeita Soe Bebé Submete Ona Primeiru Interogátoriu

Iha leitura akórdaun Juiz Prosesu Ivan Patroçinio Suritais, afirma razaun Tribunál aplika pena ne’e tanba haree ba faktu-sira iha produsaun prova iha julgamentu sira liu ba husi deklarasaun parte sira hanesan arguida, testemuña no teste ezaminasaun médiku iha duni faktu provadu ne’ebé forte katak kondenada ho asaun intensionalmente iha agostu 2019, bainhira partu tiha labarik mane-ida husi nia knotak, maske kondisaun labarik moris mai normal, maibé arguida tenta hatama labarik ba arguida nia faru laran, hafoin kous tau iha meza leten depois tuir mai arguida lori labarik ne’e tau iha saku laran hodi ba soe iha lixu fatin ida besik iha Merkadu Taibessi nian.

Mezmu nune’e parte Tribunál rasik la entende loloos katak, labarik ne’e arguida mak oho, maibé ho entendimentu Tribunál nian ba arguida hanesan inan-ida la fó asisténsia ba nia-oan rasik ne’ebé foin moris mai, ho nune’e, rezulta bebé ne’e mate no soe iha lixu fatin.

Juis Ivan Patroçinio Suritais afirma tan Tribunál mós prova katak arguida ho kondisaun psikolojia, relasiona ho nia parseiru (la’en) ne’ebé daudaun iha rai li’ur kaben ona ho feto seluk, inklui parte família mós la aseita sira atu moris hamutuk mezmu antes ne’e sira-rua iha ona oan nain-ida ne’ebé ho idade tinan-ualu (8).

Arguida Erlinda Barros, durante gravida durante fulan-sia labarik iha knotak la fó hatene família to’o partu mesak, to’o ikus, halo asaun sira-ne’e mezmu arguida hatene hela katak hahalok ne’e lei bandu.

Tribunál kondena arguida Erlinda Barros ho krime Infantisídiu ne’ebé previstu iha artigu 142 kódigu penal Timor-Leste ne’ebé hatete, kuandu inan ne’ebé oho nia-oan durante partu ka tuir kedas partu no kuandu nia sei iha hela partu nia influénsia perturbadora sei hetan pena prizaun tinan tolu (3) to’o 10. Tanba ne’e, Tribunál foti desizaun deside tuir konviksaun hodi aplika pena prizaun tinan-haat (4) ba arguida Erlinda Barros.

Juis Ivan Patroçinio Suritais husu ba arguida ho aktu ne’ebé nia halo hanesan lisaun ida no iha futuru atu labele repete tan.

Defeza Olívio Barros B. Afonso, ne’ebé fó asisténsia ba arguida nia parte sente desizaun Tribunál la justu tanba momentu ne’ebá arguida la ho intensaun atu oho labarik no la’ós nia rasik mak oho labarik, tanba ho sirkunstánsia lubuk ida ne’ebé hasoru no Tribunál rasik seidauk entende ho serteza labarik ne’e moris mai mate ka moris.

Ho nune’e durante loron-15, sura hosi desizaun akórdaun Tribunál nian, Defeza  sei halo rekursu.

Audiénsia ba akórdaun final ne’e prezide husi Juiz Ivan Patroçinio Suritais, Ministériu Públiku reprezenta husi Prokuradór Ivonia Guterres no  arguida hetan asisténsia legal husi advogadu privadu,  Olívio Barros B. Afonso.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here