Atividade iha Portu Tibar. Imajen Tatoli/Antonio Gonçalves

DILI, 12 abríl 2020 (TATOLI) – Maski Estadu deklara ona Estadu Emerjénsia hahú loron 28 marsu to’o 26 abríl 2020 hodi evita propagasaun surtu COVID-19 iha rai-laran, maibé obra Portu Tibar ho modalidade Parseria Públika Privada (PPP) kontinua la’o nafatin.

“Projetu Portu Baia Tibar hanesan projetu interese nasionál no estratéjiku ba país, ne’ebé ninia konstrusaun no atividade asosiadu sira, livre husi kualkér suspensaun ne’ebé inklui mós importasaun ka esportasaun sasán no materiál hirak ne’ebé nesesáriu atu hala’o obra konstrusaun ne’e”, relata nota husi ezekutivu, ne’ebé Agência Tatoli asesu iha domingu ne’e.

Kontinuidade ba obra ne’e ho kondisaun ida katak hahú husi fevereiru 2020, Konsesionária (Timor Port S.A), hamutuk ho reprezentante husi Governu no China Harbour Timor Lda, implementa ona medida preventiva hirak ne’ebé rigoroza no espesífika atu garante seguransa no saúde traballadór sira-nian no halo sensibilizasaun kona-ba prevensaun no kontrolu infensaun sira, atu evita COVID-19 da’et entre traballadór sira iha fatin projetu nian, fatin ke’e fatuk nian (pedreira), sentrál betaun nian, kampu traballadór no eskritóriu projetu sira nian.

Notísia Relevante: Konstrusaun Portu Tibar Atinje ona Pursentu 20

Medida hirak ne’ebé foti maka hanesan, portaun asesu nian hotu-hotu ba estaleiru konstrusaun nian, fatin ke’e fatuk nian, sentrál betaun nian no akampamentu taka hotu.

Nune’e mós, ba portaun asesu sira ne’ebé loke, iha seguransa na’in-rua maka sei kontrola no traballadór sira ne’ebé tama iha fatin refere, nia temperatura isin tenke koko iha entrada.

“Ema hotu tenke fase liman halo moos no uza máskara taka ibun nian. Pesoál hotu ne’ebé serbisu iha Portu Tibar tenke halo tuir prátika distansiamentu sosiál pelumenus metru ida husi ema seluk iha fatin hala’o obra.

Sei halo mós limpeza no dezinfesaun ba sasán hotu ne’ebé pesoál sira kaer troka malu, hanesan kaer-fatin odamatan nian, ekipamentu eskritóriu nian sira no seluk tan.

Ba vizitante sira ne’ebé la iha relasaun direta ho fatin ne’e sei labele tama durante implementa medida ne’e.

Sei halo teste saúde iha fatin entrada ba fornesedór no reprezentante fornesedór sira ne’ebé entrega materiál ka presta servisu iha fatin hala’o atividade

Ba traballadór estranjeiru sira ne’ebé hela iha fatin hala’o obra, labele sai arbiru, eseptu bainhira iha kazu balun ne’ebé mak labele evita ka karik presiza duni.

“Kualkér kazu suspeitu COVID-19 sei iha resposta emerjénsia relevante, tuir saida maka Governu Timor-Leste ezije, no seluk tan. Ho medida rigoroza hirak ne’ebé vigora no kooperasaun ida ne’ebé di’ak, parte sira ne’ebé envolve iha projetu ne’e sei halo buat hotu ne’ebé bele halo hodi hamenus efeitu husi COVID-19 iha projetu Portu Baia Tibar nian no hodi garante saúde no seguransa ba ema hotu ne’ebé envolve iha projetu ne’e”, refere nota ne’e.

Obra Portu Tibar lansa iha loron 30 agostu 2018 no tuir planu sei ramata 30 agostu 2021.

Konstrusaun Portu Tibar, lokaliza iha kilómetru 10 hosi Oeste Dili, iha Baia Tibar, Munisípiu Liquiçá, hanesan infraestrutura prioritária ne’ebé identifika ona iha Planu Estratéjiku Dezenvolvimentu (PED) 2011-2030.

Projetu ne’e ezekuta liuhosi Timor Port S.A. ho modalidade PPP entre konsórsiu Bolloré no Governu Timor-Leste.

Ba konstrusaun ne’e, Governu Timor-Leste aloka millaun $130, enkuantu Timor Port no Bolloré hamutuk millaun $140, totál millaun $270 ba faze inísiu. Totál investimentu orsamentu ba Portu Tibar to’o tinan 30 ho valór millaun $500.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here