Embaixadór Indonézia ba Timor-Leste, Sahat Sitorus. Imajen/Egas Cristovao

DILI, 09 juñu 2020 (TATOLI)–Embaxadór Indonézia iha Timor-Leste, Sahat Sitorus hateten, autoridade Indonézia nian kontinua hatudu ninia prontidaun atu orienta ninia seguransa hodi kontrola fronteira terrestre, hodi Evita movimentu ilegal ne’ebé bele transmite moras Coronavirus (COVID-19) iha rai rua ne’e.

Notísia Relevante: COVID-19, Sitorus Louva Timoroan Nia Dixiplina

“Ami mós hanesan autoridade Indonézia nian, sempre prontu atu ezekuta no tau matan ba seguransa iha liña fronteira Terrestre, atu nune’e evita movimentu kualkér sidadaun liuhosi dalan ilegál, ne’ebé bele lori perigu ba nasaun. Bainhira iha movimentu ilegal no la liuhosi kuarentena no mós la aprezenta aan iha parte saúde hodi halo uluk konsulta ba ninia saúde, sei lori perigu ba nasaun,” dehan Sahat Sitorus hafoin hala’o audiénsia ho Prezidente Repúblika Francisco Guterres “Lú Olo” iha Palásiu Prezidente Nicolau Lobato, Bairru Pité, Dili, tersa ne’e.

Sitorus agradese ba Xefe Estadu Maiór Jenerál FALINTIL Forsa Defeza Timor-Leste (F-FDTL), Lere Anan Timur, no Komandante Jerál Polisia Nasionál Timor Leste (PNTL), Faustino da Costa, ne’ebé sempre fó atensaun no tau matan nafatin ba seguransa iha área fronteira.

“Ami mós sempre husu ajuda no fó hanoin ba autoridade seguransa Indonézia nian, liuliu governadór Nusa Tenggara Timur (NTT) iha Kupang, atu nune’e fó nafatin orientasaun ba parte siguransa sira iha fronteira terrestre hodi bele kontinua matan moris neon na’in, atu vizilánsia nafatin iha fronteira no labele husik ema tama-sai liuhosi dalan ilegal,” nia hateten.

Diplomata ne’e mós iha esperansa katak, Indonézia sei bele rezolve problema COVID-19, liuliu iha área Nusa Tenggara Timur (NTT) ne’ebe fronteriza terrestre diretamente ho Timor-Leste.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here