Embaxadór Indonézia ba Timor-Leste, Sahat Sitorus. Imajen Tatoli/Cipriano Colo

DILI, 09 juñu 2020 (TATOLI)–Embaxadór Indonézia iha Timor-Leste, Sahat Sitorus, apresia no louva timoroan ninia dixiplina, perante situasaun Corona Virus (COVID-19) ne’ebé konsege luta hamutuk ho Governu hodi ultrapasa situasaun perigu ne’e liuliu kazu 24 konsege rekopera hikas.

“Ha’u hakarak hato’o ha’u nia parabens ba Governu Timor-Leste no mós timoroan hotu, ne’ebé hamutuk konsege luta kontra COVID-19, iha ne’ebé kazu 24 konsege rekoperadu no mós laiha tan kazu foun kuaze loron 40. Ida-ne’e hanesan prestasaun ida ne’ebe di’ak tebes. Ida-ne’e, tuir ha’u-nia haree katak timoroan sira iha dixiplina makaas,” Sitorus hato’o parabens ne’e, hafoin hala’o audiénsia ho Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili, tersa ne’e.

Nia dehan, ida-ne’e bele akontese tanba tuir nia haree katak timoroan sira iha dixiplina makaas no sempre halo tuir regra hosi Organizasaun Saúde Mundiál (OMS) no mós regra sira ne’ebé autoridade kompetente sira estabelese.

Entretantu, Liuhosi Sala Situasaun, Sentru Integradu Jestaun Krize (CIGC, sigla portugés) iha loron 8 fulan juñu 2020, konfirma katak rezultadu teste hosi vijilánsia sentinela ne’ebé hala’o desde loron 05 to’o 15 maiu inklui suspeitu hatudu rezultadu negativu hotu.

Hosi rezultadu vijilánsia sentinela hamutuk 820 no mós ba suspeitu 73 nia rezultadu porsentu 100 negativu hotu.

Daudaun ne’e, rezultadu laboratóriu ne’ebé sei hein rezultadu hamutuk 31, inklui vijilánsia sentinela mós nafatin halo teste.

Ema ne’ebé sei iha kuarentena hamutuk 58 iha Dili no munisípiu, barak liu maka iha munisípiu ne’ebé iha fronteira hanesan Maliana, Suai no Oé-Cusse no auto-kuarentena 56, enkuantu pasa ona kuarentena loron-14 hamutuk 2.397.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha loron 24 abríl ho totál konfirmadu na’in-24 no provável na’in-haat.

Husi totál konfirmadu ne’e, na’in-22 rejista iha Kapitál Dili enkuantu na’in-rua seluk rejista iha Munisípiu Liquiçá.

Iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu.

Kazu konfirmadu ne’ebé rejistadu iha Timor-Leste hanesan kazu importadu hosi sidadaun ne’ebé halo viajen hosi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here