Embaxadór Austrália iha Timor-Leste (TL), Peter Roberts. Imajen/Mídia PR.

DILI, 09 juñu 2020 (TATOLI)–Embaxadór Austrália iha Timor-Leste (TL), Peter Roberts,  Governu Austrália kompromete no kontinua prontu atu servisu hamutuk ho Timor-Leste hodi luta kombate Coronavirus (COVID-19).

Peter Roberts  informa asuntu ne’e, hafoin audiénsia ho Prezidente Repúblika (PR), Francisco Guterres “Lú Olo”, iha palásiu Prezindente Nicolau Lobato, Bairrupité, Dili.

“Ha’u kontente tebes bele hasoru-malu ho Prezidente Repúblika, tanba bele esplika mai ha’u kona-ba situasaun iha rai laran.  Ha’u mós ko’alia ho Prezidente Repúblika kona-ba kooperasaun entre Austrália ho Timor-Leste, ha’u dehan katak ekonómikamente Austrália  kontinua servisu hamutuk nafatin ho Timor-Leste atu luta kontra COVID-19. Iha futuru, Austrália iha nafatin komitmentu atu servisu hamutuk ho Timor-Leste iha área ekonomia no seguransa. Tanba COVID-19 la’ós fó de’it impaktu  iha área saúde maibé fó impaktu makaas iha área ekonomia, sosiál no seluk tan,” dehan Peter Roberts ba jornalista sira, tersa ne’e.

Embaxadór Austrália iha Timor-Leste (TL), Peter Roberts. Imajen/Mídia PR.

Nia hatutan, Austrália prioritiza ninia programa dezenvolvimentu hodi suporta Timor-Leste ninia resposta ba COVID-19, partikularmente oras ne’e daudaun iha área saude.

Diplomata ne’e fó ezemplu, Austrália servisu hamutuk ho Ministériu Saúde no mós Sentru Integradu Jestaun Krize, atu bele hadia fatin izolamentu, kuarentena, servisu hamutuk ho laboratóriu nasionál.

Nune’e mós, nia dehan, atu kria kapasidade foun iha Timor-Leste hodi bele halo teste iha rai laran, inklui servisu hamutuk ho FALINTIL Forsa Defeza Timor Leste (F-FDTL), Polísia Nasionál Timor Leste (PNTL) ho grupu seluk tan iha área oi-oin, hanesan instalasaun fase liman, fornese treinamentu ba ema barak oinsá prevene aan hosi COVID-19.

Antes ne’e, Austrália liuhosi ninia embaixadór iha Timor-Leste, Peter Roberts, entrega ekipamentu protesaun pesoál hanesan maskra 165, luvas rihun 20-resin, hand sanitaizer no oksijéniu 50 ba governu Timor-Leste liuhosi Ministériu Saéde.

Notísia Relevante: Governu Australia Entrega Materiál Ijiéne Ba MSSI 

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here