Embaixada Australia iha Timor Leste, ohin, entrega ekipamentu protesaun ba ekipa Task Force Ministériu Solidaridade Sosiál no Inkluzaun (MSSI). Imajen Tatoli/Osória Marques.

DILI, 22 maiu 2020 (TATOLI)–Governu liuhosi Embaixada Australia iha Timor Leste, ohin, entrega ekipamentu protesaun ba ekipa Task Force Ministériu Solidaridade Sosiál no Inkluzaun (MSSI) hodi utiliza ba apoiu monetáriu atu selu subsídiu ba uma-kain iha munisípiu sira iha ámbitu pandemia COVID-19 ne’e.

Ministériu Solidaridade Sosiál no Inkluzaun (MSSI), Armanda Berta dos Santos, hateten Governo Australia entrega materiál ijiéne ba MSSI no sei entrega ba diretór sentru sira hodi distribui ba 452 ekipa pagamentu apoiu monetáriu  iha teritoriu Timor laran tomak.

“Ha’u husu ba diretór sira atu sosializa di’ak ba prosesu no mekanizmu pagamentu ba ekipa sira iha suku no esklarese maneira atu utiliza materiál sira ne’ebé protesaun pesoál hosi COVID-19,” dehan Ministra Armanda Berta iha nia deskursu iha serimónia entrege ekipamentu ne’ebé hala’o iha Salaun MSSI, Caicoli, Dili, sesta ne’e.

Tanba ne’e, nia hatutan, Governu Timor-Leste liuhosi Ministériu Solidaridade Sosiál no Inkluzaun (MSSI) hato’o agradese ba povu no Governu Australia nia tulun.

Imajen Tatoli/Osória Marques.

“Iha okaziaun ida ne’e, hodi Governu Timor-Leste nia naran hakarak hato’o ami-nia agredese ua’in tebes ba povu Australia, mezmu iha sira nia rai rasik mós hasoru pandemia COVID-19 maibé sira sempre iha komitmentu tulun nafatin povu Timor-Leste,” nia dehan.

Nia dehan, ohin loron sesta-feira 22 maiu 2020, momentu ida ne’ebé importante tebes no hodi asiste iha entrega materiál ijiéne  ba  ekipa apoiu pagamentu monetáriu agregadus familiar ne’ebé hetan apoiu hosi Governu Australia liuhosi Partner Human Development (PHD).

Entretantu, Embaixadór Australia iha Timor Leste, Peter Roberts, hateten nia kontente no hakarak apoiu materiál prevensaun COVID-19  hodi suporta programa ne’e.

“Australia kontente tebes partisipa iha programa ida-ne’e no Australia sei fó apoiu teknikal, ekipamentu, treinamentu no polítika nune’e atu suporta programa ida-ne’e,” Embaixadór Australia ne’e informa ba jornalista sira.

Nia hatutan, ekipamentu protesaun hanesan pakote ijiéne no implementa polítika mak uza distansiamentu sosiál no fíziku nune’e bele proteje nia-an hosi korona moras COVID-19.

“Ami kontente tebes ho programa hanesan ne’e hodi servisu hamutuk ho ekipa MSSI no mós ekipa seluk atu suporta funsionáriu iha TL hodi bele halo sira-nia servisu,” nia dehan.

Tuir nia, ekipamentu ne’ebé mak apoiu ba ekipa MSSI mak hanesan pakote ijiéne mak hanesan sabaun, máskara no hand sanitizer hodi bele suporta ekipa ne’ebé distribui subsídiu ba komunidade.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here