Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Dok.

DILI, 08 juñu 2020 (TATOLI)-Provedoria Direitu Umanu no Justisa (PDHJ) finaliza ona investigasaun  kazu krime-haat (4) ba indísiu violasaun direitu umanu hasoru sidadaun balun ne’ebé komete husi membru Polísia Nasionál Timor-Leste (PNTL) iha ámbitu implementasaun estadu emerjénsia faze dahuluk.

Notísiia Relevante : CAC Deteta Irregularidade iha Kontratu ba Otél no Fornesimentu Alimentár

Auto-notísia hirak ne’e PDHJ rekomenda ona ba Ministériu Públiku (MP) hodi prosesa lei ne’ebé mak vigora.

“PDHJ halo notísia krime-haat ba MP no investigasaun balun nia prosesu lao hela,” informa Provedora PDHJ, Jesuína Maria Ferreira Gomes, liuhusi konferénsia imprensa, ohin, iha edifísiu CAC, Faról, Dili.

Provedora Jesuína Maria Ferreira Gomes hateten, ba kazu-haat seluk ne’ebé iha indísiu ba violasaun direitu umanu, daudaun  ne’e PDHJ loke hela investigasaun no seidauk finaliza.

Nia dehan, enkuantu kazu-rua ba boa-governasaun ninia PDHJ haruka ona ba parte relevante sira hodi loke investigasaun tanba la’ós tama ba kompeténsia PDHJ nian.

Iha faze implementasaun estadu emerjénsia dahuluk PDHJ simu keixa liga ba medida ezekusaun regra EE hamutuk 10 ne’ebé kompostu husi kazu-ualu  (8) ba indísiu violasaun direitu umanu no kazu-rua ba boa-governasaun.

PDHJ mós apresia ba serbisu entidade públika hotu, liu-liu ba autoridade seguransa Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’e halo atuasaun sira tuir regra sira.

Jornalista : Nelson de Sousa

Editór       : Francisco Simões

 

 

HAKEREK NO HATÁN

Please enter your comment!
Please enter your name here