CAC, PDHJ no IGE halo konfernesia imprensa iha Edifisiu CAC, Faról, Dili, segunda (08/06/2020). Imajen/Mídia CAC

DILI, 08 juñu 2020 (TATOLI) – Komisaun Anti Korrupsaun (CAC) deteta indísiu irregularidade balun ba prosesu aprovizionamentu no adjudikasaun ne’ebé governu halo ho otél sira ne’ebé sai fatin kuarentena no iha mós irregularidade balun kona-ba kontratu ho kompañia fornesedór alimentár ba abitante sira iha konfinamentu obrigatóriu ka kuarentena.

Notísia Relevante : Ekipa Anti-Korrupsaun Dezloka ba Munisípiu “Eskolta” Pagamentu Subsídiu $100

“Iha janeiru to’o juñu, tinan ne’e, CAC rejista kazu 20-resin ne’e abranje la’ós ba prosesu COVID-19 de’it. Ha’u la ko’alia substánsia espesífiku, maibé relasiona iha implementasaun estadu emerjénsia ne’ebé hahú iha fulan marsu rejista mós kazu ba indísiu irregularidade hanesan ba prosesu aprovizionamentu no adjudikasaun ba alimentasaun no hela fatin,” informa Komisáriu CAC, Sergio Hornai, liuhusi konferénsia, ohin, iha edifísiu CAC, Faról, Dili.

Iha situasaun estadu emerjénsia  luta kontra propagasaun surtu COVID-19,  Sergio Hornai hatutan, Governu iha devér asegura fatin apropriadu ba iha sidadaun ne’ebé mai husi nasaun afetadu COVID-19. Maibé, tenke rigor uza rekursu ho loloos, transparénsia no akuntabel.

“Labele utiliza situasaun emerjénsia hodi hetan vantajen patrimonial ba interese pesoál ka grupu,” afirma Sergio Hornai.

Sergio Hornai tenik tan, CAC halo hela nia prosekusaun sira hodi apura nia verdade ba indísiu sira ho loos ka la loos.
CAC mós akonsella hamutuk ho Ministériu Finansas, Ministériu Solidariedade Sosiál no Inkluzaun, Ministériu Administrasaun Estatál ho Ministériu Saúde, oinsá evita kestaun administrativa sira ne’ebé bele lori risku ba krime korrupsaun.

Apresia Esforsu Governu

Biban ne’e, Provedoria Direitu Umanu no Justisa (PDHJ), Komisaun Anti-Korrupsaun (CAC), Komisaun Funsaun Públika (CFP) no Inspektór Jerál Estadu (IGE) deklara sira-nia  apresiasaun boot ba  esforsu Governu nian hodi luta kontra COVID-19.

Komisáriu CAC, Sergio Hornai hato’o apresiasaun ba órgaun soberania sira Estadu Repúblika Demokrátika Timor-Leste, hahú kedas husi Prezidente Repúblika, Parlamentu Nasionál, Governu, Igreja no konfisaun relijioza, mídia no sira seluk-tan, hamutuk ho sosiedade sivíl ein-jerál ne’ebé hatudu vontade-ás atu prevene no kombate propagasaun COVID-19 dezde inísiu to’o ohin-loron.

PDHJ, CAC, CFP no IGE kongratula esforsu no susesu sira husi Sala Situasaun Sentru Integradu Jestaun Krize (SS-CIGC), profisionais saúde sira hotu, serbisu seguransa nasionál – PNTL, F-FDTL no parte hotu ninia kontribuisaun ba prevensaun COVI-19.

“Hakaruk ba sira ida-idak nia sakrifisiu no dedikasaun durante pandemia COVID-19,” afirma Komisáriu CAC Sergio Hornai, iha konferénsia imprensa ne’ebé akonpaña mós husi Provedora PDHJ, Jesuína Maria Ferreira Gomes ho Inspektór Jerál Estadu (IGE), Francisco de Carvalho.

Segio Hornai, hateten, iha implementasaun estadu emerjénsia PDHJ, CAC, CFP no IGE mós observa iha lamentasaun, preokupasaun deskontentamentu no protesta kona-ba irregularidade no indísiu poténsia sira ne’ebé provavelmente bele nakfilak ba pratika ba má-administrasaun, abuzu-de podér no korrupsaun. Tanba ne’e, PDHJ, CAC, CFP no IGE alerta no ezije ba entidade kompetente katak mezmu iha sirkunstánsia estadu emerjénsia nia-laran, maibé entidade públika no autoridade relevante sira la-bele hasees-an husi norma legal-jurídiku aplikavel sira, partikularmente rejime jurídiku aprovizionamentu, padraun prosedimentu operasionál no prosedimentu administrativu ne’ebé relevante ba jestaun Fundu COVID-19 nian.

Komisáriu CAC Sergio Hornai apela ba autoridade lokál no komunitária sira atu evita prátika relevante sira kona-ba kobransa ilegál, simu promesa ka halo promesa hodi hetan vantajen ruma ba nia-an ka ba ema seluk husi kualkér prestasaun serbisu ne’ebé sira halo tanba sira nia kna’ar ne’ebé sira ezerse iha prosesu pagamentu umak-kain.

PDHJ, CAC, CPF no IGE, sei halo esforsu hotu ne’ebé posivel tuir rekursu ne’ebé disponivel atu koloka ba fatin pagamentu sira hodi akompaña no halo monitorizasaun ba prosesu pagamentu sira iha nivel suku no aldeia.

“Husu partisipasaun komunidade hotu, juventude no organizasaun/asosiasaun estudante universitáriu sira atu kolabora liu husi hato’o informasaun ba instituisaun hirak ne’e bainhira ita boot sira hetan katak iha irregularidade ka poténsia risku korrupsaun, abuzu-de podér no má-administrasaun no mós diskriminasaun ruma akontese iha ita boot sira nia fatin,” tenik Sergio Hornai.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here