Embaxadór Brazíl iha Timor-Leste, Aldemo Garcia. Imajen/Mídia PR.

DILI, 08 juñu 2020 (TATOLI)–Governu Brazileira kontente ho situasaun atuál iha Timor-Leste, liuliu Aliansa Foun ne’ebé forma hosi Partidu Libertasaun Populál (PLP), Frente Revolusionáriu Timor Leste Independente (FRETILIN), no Kmanek Haburas Unidade Timor Oan (KHUNTO), iha Parlamentu Nasionál (PN).

Notísia Relevante: COVID-19, Governu Brazíl Hato’o Parabens ba TL

Embaxadór Brazíl iha Timor-Leste, Aldemo Garcia, hato’o asuntu ne’e hafoin hasoru malu ho Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili.

Aldemo Garcia informa, ninia prezensa iha palásiu tanba hetan konvite hosi Prezidente Republika, atu esplika kona-ba situasaun polítika foun iha país ne’e, liu-liu Kona-ba formasaun maioria foun Parlamentu Nasionál, kompostu hosi PLP, FRETILIN no KHUNTO.

“Prezidente Repúblika, konvida ha’u mai iha palasiu, ohin, atu esplika kona-ba situasaun polítika foun iha país ne’e, kona-ba formasaun maioria foun Parlamentu Nasionál, kompostu hosi PLP, FRETILIN no KHUNTO. Hahú ohin ba oin, ita hein no hahú daudaun ho estabilizasaun polítika país nian. Ami ko’alia nakloke ba malu  no ha’u mós manifetsa ha’u ninia hanoin, katak Governu Brazileiru kontente loos ho situasaun atuál, liu-liu kona-ba aliansa foun, ne’ebé sei lori estabilizasaun ba país ne’e,” nia esplika.

Nia dehan, durante enkontru ne’e mós Prezidente Repúblika esplika kona-ba akontesimentu sira haneesan formasaun aliansa maioria foun iha Parlamentu Nasionál, ne’ebé servisu hamutuk ho Primeiru Ministru, Taur Matan Ruak, hodi fó ona pose ba Ministru sira na’in ualu iha semana kotuk no mós kona-ba pose tuir mai ba membru Governu foun iha semana oin.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here