Embaxadór Brazil iha Timor-Leste, Aldemo Garcia. Imajen/Mídia PR.

DILI, 08 juñu 2020 (TATOLI)–Governu Brazíleiru liuhosi ninia embaxadór iha Timor-Leste, Aldemo Garcia, hato’o parabéns ba Povu Timor-Leste (TL) liuliu Governu ne’ebé konsege rezolve kazu Coronavirus (COVID-19) ho nia kazu pozitivu 24 no oras ne’e livre ona.

Aldemo Garcia hato’o parabens ne’e durante hala’o enkontru ho Prezidente Repúblika (PR), Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili.

“Aproveita mós opotunidadde ida-ne’e, hodi hato’o parabens ba Governu timorense no país tomak, iha ambitu kombate Coronavirus (COVID-19). Hanesan ita hotu hatene katak, antes ne’e ita iha kazu 24, kompostu hosi estudante timoroan sira ne’ebé maihosi Indonézia, no oras ne’e daudaun ita laiha ona kazu (rekoperadu), laiha kontaminasaun lokál (komunitáriu) no kazu hirak ne’e rekoperadu. Ida-ne’e hanesan ezemplu di’ak ida,” Aldemo ko’alia ba jornalista sira, segunda ne’e.

Nia mós halo komparasaun ho Bazíl ne’ebé atualmente enfrenta situasaun ida ne’ebé difísil tebes, tanba iha kazu mate hamtuk 35.000 no oras ne’e daudaun enfreta difikuldade boot ho surtu COVID 19.

“Ha’u halo komparasaun ho Bazíl ne’ebé oras ne’e enfrenta situasaun difisil tebes, tanba ita iha kazu mate hamtuk 35.000, no oras ne’e daudaun mós ita hasoru difikuldade boot ho surtu COVID 19 iha Brazil,” nia halo komparasun.

Tanba ne’e, nia hatutan,  Timor-Leste merese atu hetan parabens tanba bele konsege rezolve problema ida-ne’e.

Oras ne’e daudaun Timor-Leste iha hela situasaun Estadu Emerjénsia ba datoluk, ho nia durasaun to’o loron 27 fulan ne’e, atu evita transmisaun surtu COVID-19 iha rai laran.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here