Segundu Komandante Operasionál CIGC, Brigadeiru Jenerál João Miranda 'Aluc Descartes' Simu Material Desinfetante Atu Ajuda Eskola no Klinika Sira Prevensaun COVID-19 Husi Embaixadora Estadu Unidu Amérika (EUA) ba Timor-Leste, Kathleen M. Fitzpatrick. iha CCD, Segunda (08/06). Imajen /Egas Cristovão

DILI,08 juñu 2020 (TATOLI)-Estadus Unidus Amérika (EUA) segunda ne’e, entrega tan apoiu ekipamentu dezifentante konsentradu liu litru 1.500 no materiál limpeza hanesan luvas, máskara no seluk tan ba Sala Situasaun Sentru Integradu Jestaun Krize (CIGC-sigla portugés) hodi fahe ba Sentru Saúde no Eskola sira para prevene transmisaun surtu coronavirus iha Timor-Leste.

Aleinde ne’e oferese mós matéria formasaun hodi konverte dezifentante konsetradu litru 1.500 sai fali líquidu limpeza liu litru 750.000  hodi uza.

Embaixadóra EUA, Kathleen Fitzpatrick ho Xefe Gabinete Kooperasaun Defeza Majór, Pablo Valerin maka entrega diretamente apoiu ne’e ba Segundu Komandante Operasionál CIGC, Brigadeiru Jenerál João Miranda “Aluc Descartes” iha Sentru Konvensaun Dili.

“Estadus Unidus parseria ho governu sira iha mundu tomak atu hapara propagasaun COVID-19,” dehan Kathleen Fitzpatrick.

Notísia Relevante :EUA Apoiu Máskara ba MEJD

Kathleen, garantia ho fornesimentu apoiu ne’e sei tulun liután Governu atu halo prevensaun no kombate tranmisaun COVID-19 iha komunidade nia leet.

“Ami espera katak estudante Timoroan sira bele fila hikas ba eskola no ba konsulta iha Sentru Saúde ho seguru,” nia dehan.

Projetu ida ne’e finansia husi Komando Militár Indo-Pasífiku EUA ho orsamentu apoiu ba COVID-19 hamutuk  $ 125.000.

Projetu ne’e parte ida husi totál apoiu orsamentu millaun $ 1.6 ne’ebé maka Estadus Unidus Amérika oferese ba Governu Timor-Leste hodi luta hasoru COVID-19.

Diplomata EUA ne’e esplika sira-nia Governu investe ona besik millaun $ 70 ba asisténsia saúde iha Timor-Leste, husi totál millaun $ 542 ne’eb’e investe ona iha área hotu-hotu durante tinan 20 nia laran.

Iha biban hanesan Brigadeiru Jenerál, João Miranda “Aluc Descartes” reprezenta CIGC no Governu hodi agradese ba Governu Estadus Unidus Amérika tanba fó ona apoiu fasilidades prevensaun COVID-19.

“Lori estadu no povu Timor-Leste nia naran hakarak agradese ba Estadus Unidus Amérika nia tulun, ami fiar katak ho ita-nia servisu hamutuk ne’e bele kombate COVID-19 iha nasaun ne’e,” katak Aluc.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here