Ministra Edukasaun, Juventude No Desportu, Dulce De Jesus Soares, simu apoiu maskara husi Embaixadora Amérika Ba Timor-Leste, Kathleen M. Fitzpatrick iha salaun MEJD, Vila-Verde, Dili Tersa (02/06).Imajen /Egas Cristovão

DILI, 02 juñu 2020 (TATOLI)-Estadus Unidus Amérika (EUA) iha tersa ne’e apoiu máskara reutilizaveis rihun ida resin ba Governu liuhosi Ministériu Edukasaun Juventude no Desportu hodi halo prevensaun ba propagasaun COVID-19.

Embaixadora Estadus Unidus Amerika (EUA), Kathleen M. Fitzpatrick no Xefe Gabinete Kooperasaun Defeza, Pablo Valerín entrega diretamente ba Ministra Edukasaun Juventude no Desportu, Dulce de Jesus Soares, iha edifísiu MEJD Vila-Verde, ohin.

“Ami apoia governu Timor-Leste liuhusi investimentu ba foinsa’e Timoroan sira, máskara sira ne’e sei garante estudante sira seguru fila ba eskola no nu’udar forma protesaun adisionál ida hasoru COVID-19 no prevene moras seluk mos,”dehan Kathleen Fitzpatrick.

Máskara hirak ne’e prodúz husi feto Timoroan ne’ebé maka asesu finansiamentu husi EUA tanba kategoria ekonomikamente marjinalizada durante fulan-rua.

Projetu ne’e nia objetivu mak prevene propagasaun moras infesioza sira, oferese oportunidade ekonómika, no reduz lixu ospitalár.

“Projetu ne’e finansia husi Estadus Unidus nia Komando Militár iha Indo-Pasífiku ne’ebé iha komitmentu bo’ot atu apoiu luta hasoru COVID-19 iha rejiaun ne’e,”tenik Diplomata EUA ne’e.

Nia relata projetu ne’e parte ida husi orsamentu millaun $ 1.6 ne’ebé alokadu ba apoiu Governu Timor-Leste hodi luta kontra COVID-19.

Antes ne’e, nia parte mos apoiu ona tanke fase liman ba Governu hodi halo prevensaun ba transmisaun surtu coronavirus.

Estadus Unidus investe ona besik millaun $70 ba asisténsia saúde no durante tinan 20 EUA oferese ona millaun $ 542-resin ba TL hodi hala’o dezenvolvimentu.

Iha biban ne’e, Ministra Edukasaun Juventude no Desportu, Dulce de Jesus Soares, agradese tulun ne’ebé maka oferese husi Estadus Unidus Amérika.

“Ministériu Edukasaun agradese tebes ba Embaixada Estadus Unidus Amérika ne’ebé mak fó ona apoiu ba Ministériu liliu hodi tulun estudante sira iha tempu aprendijazen ne’ebé mak sei hahú iha tempu besik,”dehan Governante.

Nia esplika ba EUA katak Ministériu Edukasaun sei enfrenta problema ekipamentu prevensaun COVID-19 atu distribui ba eskola hotu iha territóriu TL.

“Agora Ministériu sei hasoru problema ida mak padraun ne’ebé mak Ministériu Saúde ho OMS hatur ona katak, iha eskola hotu tenke iha bee, sabaun no máskara, entaun ba Ministériu Edukasaun ho apoiu ida ne’e ajuda tebes ami hodi prienxe padraun hirak ne’ebé tau iha dekretu Governu ne’e,” Nia orgullu.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here