CAC, PDHJ ho IGE ofisiálmente husik ekipa Espesialista Anti-Korrupsaun (EAK) ba munisípiu hodi “eskolta” pagamentu subsídiu $100 ba kada uma-kain iha territóriu nasionál. Imajen/Mídia CAC

DILI, 08 juñu 2020 (TATOLI) – Ekipa Espesialista Anti-Korrupsaun (EAK) husi Komisaun Anti-Korrupsaun (CAC), Provedoria Direitu Umanu no Justisa (PDHJ) ho Inspektór Jerál Estadu (OGE), ohin, dezloka ona ba munisípiu hotu hodi “eskolta” prosesu pagamentu subsídiu $100 ba fulan-rua nian ($200, husi 27 marsu-maiu) ba kada uma-kain.

Notísia Relevante : CAC, PDHJ, IGE, JSMP ho FONGTIL “Eskolta” Ezekusaun Fundu COVID-19

“Ekipa ne’e sei akompaña prosesu pagamentu monetáriu ba agregadu familiar,” hateten Komisáriu CAC Sergio Hornai, liuhusi konferénsia imprensa iha edifísiu CAC, Faról, Dili.

CAC mós serbisu hamutuk ho organizasaun la’ós Governu nian no grupu voluntáriu nian hanesan FONGTIL, Judisial System Monitoring Program (JSMP), Klibur Foin-sa’e Umanitáriu (KFH), estudante ativista direitu umanu husi AJAR (Asian Justice and Human Right) hodi apoiu monitoriza mós suku hotu iha territóriu laran.

Sergio Hornai, afirma CAC ho parte sira komprometidu iha espíritu hanesan hodi konsolida ona forsa no mós estratéjia atu akompaña prosesu sira ezekusaun fundu COVID-19 nian.

Sergio Hornai, konsidera pasu importante ho kolaborasaun ba serbisu entre instituisaun sira-ne’e haknaar ba asuntu boa-governasaun no iha luta kontra korrupsaun nian ba povu no nasaun Timor-Leste.

CAC, PDHJ no IGE no parte sosiedade sivíl sira halo “eskolta” ho másimu ba prosesu pagamentu ne’e no iha devér atu foti dadus bainhira mosu irregularidade.

Jornalista : Nelson de Sousa

Editór       : Francisco Simões

 

 

HAKEREK NO HATÁN

Please enter your comment!
Please enter your name here