Diretór Sentru Solidariedade Sosiál Munisípiu Lautem, Paulo da Silva Pinto, hala’o enkontru preparasaun atu sosializa ka introdus matadalan prosesu pagamentu Subsídiu Apoiu Monetáriu iha ÂmbitU Pandemia Covid-19, ne’ebé hala’o iha edifísiu Sentru Solidariedade Sosiál Munisípiu Lautem Pato, Fuiluro.

DILI, 06 juñu 2020 (TATOLI)–Diretór Sentru Solidariedade Sosiál Munisípiu Lautem, Paulo da Silva Pinto informa, preparasaun ba distribuisaun subsídiu Corona Virus (COVID-19), liu-liu $100 ba kada uma ka’in atinje ona 90%, nune’e munisipíu ne’e prontu ona atu halo pagamentu iha tersa (09/06) semana oin.

Notísia Relevante: Governu Benefísia Uma-Kain 298.119 iha Munisípiu 12

Liuhosi telefonika, Paulo hateten horisehik parte Sentru Solidariedade Sosiál Munisípiu Lautem hamutuk ho inter-depertementu ne’ebé enkaixa iha ekipa integradu ba pagamentu subsidiu ne’e, organiza autoridade munisipál no autoridade lokál sira hodi hala’o enkontru preparasaun atu sosializa ka introdus matadalan prosesu pagamentu Subsídiu Apoiu Monetáriu iha ÂmbitU Pandemia Covid-19, ne’ebé hala’o iha edifísiu Sentru Solidariedade Sosiál Munisípiu Lautem Pato, Fuiluro.

“Enkontru ne’e bazeia ba deklarasaun Ministra Solideriedade Sosiál no Inkluzaun katak, iha tersa semana oin, tenke halo pagamentu ba subsidiu $100. Tanba ne’e mak ekipa task force Surtu COVID-19 Munisipiu Lautem, kompstu hosi Ministériu Solidariedade Sosiál no Inkluzaun (MSSI), Ministériu Administrasaun Estatál (MAE), Ministériu Finansas (MF), inklui seguransa no Defeza, ne’ebé fó ona orientasaun ba munisípiu atu halo koordenasaun, nune’e, hosi Munisipiu Lautem rasik halo ona koordenasaun desde Kinta (04/06), hamutuk  ho administradór munisípiu, administradór postu administrativu sira atu relata lista editais ba kada postu, depois maka sira distribui ba kada suku,” dehan Paulo da Silva Pinto ba Ajénsia TATOLI, sabadu ne’e.

Paulo Pinto esplika, durante enkontru ne’e ko’alia liu kona-ba mekanizmu no prosesu pagamentu, oráriu katak iha Munisipiu Lautem sei hahú halo levantamentu iha loron 8 fulan ne’e ba postu administrative tolu mak hanesan Postu Administrativu Lospalos ne’ebé iha suku sanulu, sei ba hamutuk iha sukursál BNCTL Lospalos, hafoin bele destaka ba suku ida-idak no iha tersa loron 9 fulan ne’e bele halo ona pagamentu.

Postu Administrativu  Tutuala mós sei realiza levantamentu iha loron 8 ho modelu hanesan, nunee mós Postu Administrativu Lautem sei halo levantementu iha parte lorokraik.

“Pagamentu sei realiza iha loron 9 fulan ne’e ba postu tolu ne’e. Tuir kalendáriu ne’ebé xefe suku no xefe aldeia sira iha mak sei deside kona-ba aldeia ida ne’ebé mak simu uluk. Iha levantamentu ne’e xefe suku tenke marka prezensa atu nune’e nia rasik mak sei foti osan ne’e hodi entrega ba ekipa, bele tau iha brankas suku ninian, hafoin  bele halo pagamentu,” nia subliña.

Kona-ba Postu Administrative Luro, sei halo levantamentu iha loron 9 no sei halo pagamentu iha loron 10 fulan ne’e, no Postu Administrativu Iliomar sei realiza levantamentu iha loron 10 no pagamentu iha loron 11 fulan ne’e.

Ekipa integradu munisipál ne’e, mós esplika detalla ona ba autoridade lokál sira liuliu xefe suku sira hotu hosi Munisipiu Lautem oinsá kontrola lista,hatene reklamasaun sira, hatene kona-ba deklarasaun absensia, bainhira xefe família laiha sé mak merese atu bele substitui hodi simu ninia direitu ne’e.

Ekipa ne’e mós koordena ona ho parte Polisia Nasionál Timor Leste Munisipiu Lautem hodi bele fó apoiu seguransa durante prosesu pagamentu, inklui Ofisial Polisia Suku (OPS) ne’ebé hola parte iha ekipa ne’e atu asegura prosesu ne’e tomak.

Lista editais hosi Munisípiu Lautem ne’ebé aprova ona hosi MSSI atu bele hetan subsidiu ne’e hamutuk 18.472, hosi postu administrativu lima ho nia suku hamutuk 34.

Munisipiu Lautem rasik,  iha funsionáriu públiku ne’ebé la merese atu hetan subsidiu ne’e hamutuk 115, tanba kada fulan manan saláriu $500 ba leten.

Munisipiu Lautem iha postu administrativu lima mak hanesan Postu Administrativu Iliomar ho nia suku sira Aelebere, Caenlio, Fuat, Iliomar 1, Iliomar 2, Tirilolo.

Postu Administrativu Lautem ho nia suku sira mak hanesan, Baduro, Com, Daudere, Euquisi, Ililai, Maina 1, Maina 2, Pairara, Parlamento, Serelau.

Postu Administrativu Lospalos ho nia suku sira mak hanesan, Bauro, Cacavei, Fuiloro, Home, Leuro, Lore 1, Lore 2, Muapitine, Raça, Souro.

Postu Administrativu Luro ho nia suku sira mak hanesan Afabubu, Baricafa, Cotamutu,Lacawa,Luro, Wairoque no postu administrative Tutuala ho nia suku sira mak hanesan Mehara ho Tutuala.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here