Lider Karizmátiku, Kay Rala Xanana Gusmão, apoia ai-han ba populasaun kbiit-laek 130 iha Aldeia Bedois- Suku Kamea- Dili, segunda (01/06/2020_. Imajen/Eugénio Pereira

DILI, 01 juñu 2020 (TATOLI) – Populasaun kbiit-laek hamutuk ho defisiénsia, purvolta ema na’in-113, husi Aldeia Bedois, Suku Camea, Postu Administrativu Kristu Rei, Munisípiu Dili, hato’o agradese ba eis Prezidente Repúblika (PR), Kay Rala Xanana Gusmão, ne’ebé halo asaun solidariedade hodi fahe ai-han hanesan foos, suprime, mina no ai-han seluk tan ba sira iha tempu susar tebes ne’e nia laran.

Notísia Relevante : Xanana ho Ekipa g7+ Apoia Ai-Han ba Uma-Kain 50 iha Suku Liurai

Reprezentante Komunidade Bedois, Antónia da Costa Freitas hato’o agradese ba Xanana, mezmu la’ós ema riku, maibé nia koñese di’ak povu nia sortimentu iha tempu estadu emerjénsia hodi luta hasoru propagasaun surtu COVID-19.

“Avó Nana (Xanana) la’ós ema riku, nia kiak hanesan ita, maibé nia hadomi ita. Ohin mai too ita hodi fó apoiu  ai-han ba ita, ami hato’o ba agradese ba domin boot ne’e,”  hateten  Antónia bainhira simu apoia ai-han husi lider karizmátiku ne’e, segunda (01/06/2020), iha Kapela Santo António Bedois, Dili.

Populasaun sira ne’ebé simu apoiu ne’e promete sei la haluha Xanana nia favor no nia domin boot ne’e. Mezmu apoia ne’e folin laek ba ema seluk, maibé lori rahun diak tebes ba hirak ne’ebé daudaun ne’e simu iha situasaun ida susar tebes ne’e nia laran.

“Ita loke ita matan, ita sei ita nia tulun hodi rona no haree direita avó Nana nia hadomi hodi fahe nia forsa ba ita, ita agradese  mós ba Aman Maromak,” Antónia hateten.

Iha fatin hanesan, Administradór Kristu Rei, Gaspar da Silva, lori família sira ne’ebé simu apoiu husi Xanana hato’o mós agradese tanba iha situasaun estadu emerjénsia ne’e ema hotu moris susar hetan osan no hetan ai-han.

Gaspar husu ba povu uza hahán hodi hein mós apoiu husi Governu Timor-Leste kona-ba subsídiu $100 kada uma kain ne’ebé sei fahe iha tempu besik.

Kay Rala Xanana Gusmão rasik husu atu povu kontinua kumpre nafatin regra Estadu Emerjénsia para bele prevene-aan husi propagasaun surtu Coronavirus ka COVID-19.

“Situasaun COVID-19 iha mundu tomak, iha Amerika ema mate barak, rai boot rai riku, mais ema mate nabanaban de’it, tanba ne’e ita halo tuir saida maka estadu haruka,” Xanana hateten.

Hafoin fahe apoiu ne’e, Xanana Gusmão ho família no populasaun sira kontinua vizita no presta omenajen ba Monumentu Masakre Asasinatu 24 Fevereiru 1999 ne’ebé oho joven na’in rua hanesan, Francisco Hornay ho Juaquim de Jesus.

Xanana ho joven ida toka hela viola. Imajen/Eugénio Pereira

Xanana mós uza oportunidade ne’e hodi toka viola hodi hananu múzika ho joven sira ho tema “Unidade Nasionál no Dame” hodi fanun joven sira iha Aldeia Bedois bele kontribui nafatin ba dame.

Apoiu Ai-han ba Populasaun Kulu-hun

Iha parte loro-kraik nian, Xanana Gusmão akompaña husi Xefe Suku Kulu-hun California, Deus Dado Martins fahe mós apoiu ai-han hanesan foos saka 40, supermie, mina ba família kbiit laek na’in 43 kompostu husi Aldeia Funu Hotu no Loelaku.

Xefe Suku Deus Dato Martins hato’o agradese ho apoiu umanitáriu ba nia populasaun sira ne’ebé sira identifika susar no presiza hetan apoiu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here