Labarik nain tolu halimar hela iha bero Leten iha Tasi ibun Bidau Santana, Dili 29 Marsu 2017. Labarik sira halimar hodi hein sira nia aman sira neebe ba buka ikan iha Tasi laran.Foto TATOLI

DILI, 04 juñu 2020 (TATOLI)–Xefe Departamentu Bolsa da Mãe, Roberto Q. Amaral Roberto, informa iha tinan 2020, Ministériu Solidaridade Sosiál no Inkluzaun (MSSI) liuhosi Departamentu Programa Bolsa da Mãe halo verifikasaun ba dadus ne’ebé pendente iha Timor laran tomak hamutuk 13,446.

Notísia Relevante: Benefisiáriu Bolsa da Mãe 47.525 Simu Subsídiu

“Iha tinan 2020 ne’e, ami halo verifikasaun dadus pendente hamutuk 13,446 ba territóriu Timor laran tomak,” dehan Roberto Q. Amaral iha nia knaar fatin MSSI, Caicoli, Dili, kinta ohin.
Nia hateten, iha tinan 2020 ne’e Ministériu Solidaridade Sosiál no Inkluzaun (MSSI) halo verifikasaun kontinua de’it ba dadus Bolsa da Mãe tinan 2019 nian ne’ebé pendente maibé la reajusta tanba orsamentu xumba foin lalais ne’e.

“Loloos ne’e iha tinan 2020 atu halo planu reajusta maibé orsamentu xumba tiha entaun ami-nia planu mós labele la’o tanba buat hotu la’o bazeia ba osan. Ne’ebé, agora ami verifika de’it mak lista pendente hosi tinan 2019 nian ba kotuk, ami emprime hodi hadi’a fali,” nia haktuir.

Loloos ne’e, nia dehan, servisu hirak ne’e la’o hela maibé tanba mosu situasaun COVID-19 no impase polítika entaun buat hotu paradu. Maibé, tuir nia, antes mosu ho COVID-19 ne’e MSSI iha ona servisu hodi halo verifikasaun dadus pendente ne’ebé entrega ba iha sentru sira iha munisípiu hotu, nune’e MSSI la konsege reajusta iha territóriu Timor laran tomak.

“Entaun, tinan ida ne’e, ami la konsege reajusta iha territóriu laran tomak tanba orsamentu xumba. Maibé ami sei iha dadus ema sira ne’ebé pendente iha hela ami-nia sistema laran ne’e. Ho ida ne’e, planu no maneira ida atu imprime naran hirak ne’e hodi hadi’a de’it no verifika fali,” nia dehan.

Tuir nia, kritériu atu hetan bolsa da mãe hahú hosi labarik tinan sei nurak ho idade 0 (zero), presiza inan-aman nia eleitorál no sei prenxe formuláriu pois MSSI sei haree kondisaun ne’e vuneravél duni ka la’e.

“Tanba bolsa da mãe ne’e haree liubá ema ne’ebé vuneravél mak iha direitu hodi hetan maibé hanesan ita funsionáriu públiku, forsa, polísia, no veteranu sira ne’e labele hetan. Tanba ne’e, haree ema ne’ebé atu hetan maka haree ba saláriu $100 mai kraik mak bele hetan. Ami iha kritériu no leí ne’ebé fó pagamentu ba labarik sira nia simu to’o de’it tinan sanulu resin-hitu (17),” nia hateten.

Maibé realidade hatudu iha funsionáriu balu nia oan mós simu bolsa da mãe, nia hatán, tinan uluk orientasaun ba postu hotu ne’e mak ema sira ne’ebé funsionáriu hetan saláriu ki’ik hanesan $ 115 bele tama hetan hotu. Maibé, nia informa, agora orientansun tuir fali mai ema sira funsionáriu ne’e labele simu tan ona.

Tanba ne’e, nia haktuir, MSSI sei halo sosializasaun ba iha munisípiu sira to’o iha área rurál sira no sei halo sensibilizasaun ba inan-aman sira, oinsá bele hatene lala’ok atu hetan bolsa da mãe.

“Ami Departamentu Bolsa da Mãe iha planu atu halo sensibilizasaun ba iha komunidade atu nune’e sira bele hatene kla’an kona-ba bolseiru bolsa da mãe ne’e nia lala’ok ne’e oinsá. Nune’e, sira hatene katak bolseiru bolsa da mãe ne’e ba de’it mak ema vuneravél duni, tanba inan-aman sira iha baze la hatene kona-ba prosesu ne’e maibé haré fali orsamentu iha mak hala’o planu sira ne’e,” nia haklaken.

Antes seidauk mosu impase polítika, nia hateten, MSSI hala’o ona sosializasaun ba munisípiu balu no planu tinan oin ne’e sei halo sensibilizasaun iha munisípiu Dili, Atauro, Ainaro no Suai.

Maibé, nia dehan, orsamentu seidauk iha entaun sei hein maibé MSSI sei buka meiu oinsá para hodi fó sensibilizasaun ba inan-aman sira ne’ebé iha área izoladu ne’e, mai tau sira-nia naran hodi hetan osan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here