DILI, 07 Novembru 2019 (TATOLI)-Ministériu Solidariedade Sosiál no Inkluzaun (MSSI) hamutuk ho Banku Nasionál Komérsiu Timor-Leste (BNCTL-sigla Portugés), ohin, hahú hala’o pagamentu ba faluk ho oan ki’ak hamutuk 47.525 iha territóriu laran hodi sai ona benefisiáriu ba programa Bolsa da Mãe.
Notísia Relevante: Benefisiáriu Bolsa da Mãe 180.595
Diretór Nasionál Asisténsia Sosiál, Lucas Teois, informa hosi totál benefisiáriu 47.525 ne’e; mane 5.436 no feto 42.089. Pagamentu ne’e hala’o iha Postu Administrativu hotu, hahú loron 7 to’o loron 25 novembru 2019.
Hosi total benefisiáriu ne’e, kompostu hosi Munisípiu Aileu hamutuk na’in 2.552, Ainaro (3.485), Baucau (4.785), Bobonaro (3.865), Covalima (3.970), Dili (5.466), Ermera (3.332), Lautem (3.579), Liquiça (3.294), Manatuto (2.601), Manufahi (3.054), Rejiaun Administrativu Espesiál Oe-Cúse Ambeno (4.696) ho Viqueque na’in 2.846.
“Pagamentu bolsa da mãe ne’e, ita hala’o tinan ida dala ida, ne’ebé daudaun ne’e, ita hahú hala’o pagamentu hela,” informa Diretór DNAS, MSSI Lucas Teois, ohin, ba TATOLI, iha ninia servisu fatin Caicoli, Dili.
Diretór ne’e esplika, kada fulan benefisiáriu ida simu $5.00 tanba ne’e tinan ida kada benefisiáriu simu $60.00.
Governu liuhosi MSSI aloka millaun $6,119.520 ba programa bolsa da mãe hodi fó tulun ba família vulneravel sira, hanesan faluk, oan ki’ak no família la iha kbiit finanseira atu sustenta oan ba eskola.
MSSI implementa ona polítika ne’e iha tinan 2008 tuir dekretu lei númeru 18/04/2012 ho objetivu atu promove labarik hosi tinan 0-17 liuliu atu asesu ba eskola mínimu frekuente to’o ensinu sekundáriu no asesu saúde.
Jornalista : Nelson de Sousa
Editór : Francisco Simões
