DILI, 04 juñu 2020 (TATOLI) – Ministru Defeza no Ministru Interiór Interinu, Filomeno da Paixão de Jesus, ohin, hala’o enkontru ho Embaixadóra Estadu Unidus Amerika (EUA) mai Timor-Leste, Kathleen M, Fitzpatrick, hodi ko’alia projetu reabilitasaun Aeroportu Baucau.
Notísia Relevante : Reabilita Aeroportu Baucau, EUA Hala’o Ona Konsulta Internu
Embaixadóra Kathleen M, Fitzpatrick hateten, Governu EUA hein hela bainhira Governu Timor-Leste konklui iha prosesu, ekipa tékniku sei tun hodi hahú hadi’a ona aeroportu ne’e, inklui fó aviaun ida ba Governu Timor-Leste.
Nia informa, EUA rasik aprova ona orsamentu Millaun $10 hodi hadi’a infraestrutura tomak husi Aeroporto de Baucau ne’ebé iha primeiru Governu hanaran Aeroportu Vicente Reis “SAHE”.
“Ami hala’o reuniaun atu atualiza progresu iha ami nia kooperasaun Governu Timor-Leste diskute prosesu kooperasaun iha área defeza no prosesu atu hadi’a projetu Aeroporto de Baucau,” hateten Embaixadóra Kathleen ba jornalista liuhusi konferénsia imprensa iha Edifísiu Ministériu Defeza, Fatuhada, Dili.
Diplomata ne’e mós informa ba Ministru Filomeno atu hametin liután kooperasaun setór defeza rai-rua inklui diskute apoiu EUA ba Governu Timor-Leste hodi luta kontra propagasaun surtu Coronavirus ka COVID-19.
Iha fatin hanesan, Ministru Filomeno dehan, enkontru ne’e importante tebes, tanba EUA iha komitente atu hadi’a Aeroporto de Baucau, bele aselera lalais ninia prosesu iha tinan-ne’e.
“Aeroporto de Baucau nian ne’e EUA tau ona Millaun $10. Sira hakarak ho F-FDTL haree nia planeamentu ba oin hodi komesa halo serbisu, tanba sira atu fó aviaun ki’ik-ida para atu halo vijilánsia,” hateten Ministru Filomeno da Paixão de Jesus.
Iha Fevereiru liubá, Ministru Filomeno rasik vizita ba Hawaii- Amerika hodi partisipa enkontru Defence Bilateral Meeting (DBM) no kooperasaun serbisu iha State Patterners Ships (STP) bele dezenvolve lalais liután.
Ministru Filomeno hala’o mós enkontru ho reprezentante Nasoins Unidas iha Timor-Leste hodi ko’alia kooperasaun serbisu, inklui sei hala’o enkontru ho diplomata sira ne’ebé hala’o misaun iha Timor-Leste.
Jornalista : Eugénio Pereira
Editór : Francisco Simões
