DILI, 21 maiu 2020 (TATOLI)—Prezidente Parlamentu Nasionál, Aniceto Guterres, hateten meza Prezidente Parlamentu Nasionál ne’ebé rahun sei hatuur no hafoun hikas hosi lia-na’in sira liuhosi serimónia ritual.

“Meza Prezidente Parlamentu Nasionál nian ne’ebé hetan estragus, temporariamente tuur iha kraik. Entaun, meza ne’ebé hetan estragus sei hafoun no hatuur ho lisan Timor nian katak lia-na’in sira sei halo serimónia ritual ida. Ami sei prepara oinsá mak ritual ne’e la’o fulan ida ka fulan rua. Sei lori lia-na’in ka kuku sira iha Timor laran ne’e, mínimu hosi 13 distritu mai para hafoun fila-fali uluk hatuur tuir kultura lisan Timor ninian,” dehan Aniceto Guterres ba jornalista sira hafoin prezide reuniaun líder bankada iha Parlamentu Nasionál, kinta ne’e.

Prezidente Parlamentu Nasionál ne’e haktuir, uluk parlamentu sai Uma Fukun entaun fukun Timor nian sei mai hotu hodi harii tiha meza ne’e, la’ós tau de’it meza hanesan bainbain.

“Agora hetan estragu hanesan ne’e entaun atu harii fila-fali bankada parlamentár hotu-hotu konkorda halo ritual,” nia dehan.

Maibé Prezidente Parlamentu Nasionál ne’e esplika, realizasaun rituál ne’e sei lori fulan tanba presiza haree ba kustu.

Nia subliña, bainhira lia na’in sira halo tuir ona bazeia ba kultura Timor nian entaun prezidente parlamentu nasionál tuur iha parte leten hodi lidera kualkér sesaun plenária maibé provizoriamente sei tuur iha parte kraik nune’e garante funsionamentu parlamentu nian funsiona nafatin.

Notísia Relevante: Deputadu CNRT Baku-Fila Meza Prezidente Parlamentu Nasionál

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here