Diretór Ezekutivu/CEO Konsellu Administrasaun BNCTL, Brigido de Sousa. Imajen Tatoli/Egas Cristovão.

DILI, 03 juñu 2020 (TATOLI)–Diretór Ezekutivu/CEO Konsellu Administrasaun Banku Nasionál Komérsiu Timor Leste (BNCTL, sigla portugés), Brigido de Sousa, hateten bainhira halo pagamentu subsídiu ba agregadu familiar, BNCTL sei uza banku movél hodi halo pagamentu to’o iha Postu Administrativu sira.

Notísia Relevante: Governu Benefísia Uma-Kain 298.119 iha Munisípiu 12

“Halo pagamentu ba subsídiu uma-kain iha Munisípiu sira, ami uza mesak ami-nia karreta, rekursu no banku movél hodi lori osan to’o iha Postu Administrativu sira mak ekipa pagamentu sei foti no fahe ba benfisiária sira iha suku no aldeia,” Diretór Ezekutivu/CEO Konsellu Administrasaun BNCTL, Brigido de Sousa ba jornalista sira hafoin hala’o Konferénsia Imprensa iha MSSI, Caicoli, Dili, kuarta ne’e.

Kona ba kalendáriu pagamentu, nia hatutan, BNCTL halo ona konkordánsia ho MSSI katak iha loron tolu nia laran sei halo hotu pagamentu ba to’o iha Postu Administrativu de’it.

“Tuir oráriu ne’ebé mak ami konkorda ho Diretór Jerál MSSI iha loron tolu atu halo despaisu pagamentu simultaneamente, siginifka katak hahú hosi loron 8, 9 no 10 juñu mak BNCTL tenke selu hotu ona ekipa sukursal 12 iha Munisípiu sira,” nia dehan.

Tanba, nia hatutan, osan ne’ebé mak Ministériu Finansas (MF) prevee ba iha Banku Nasionál Komérsiu Timor Leste (BNCTL, sigla portugés) hamutuk millaun $59.6 ne’e, BNCTL sei selu ba ekipa pagamentu suku nian depois ekipa ne’e mak sei selu ba benefisiária sira iha suku no aldeia, tuir mekanizmu no maneira ne’ebé mak MSSI determina.

“Osan ne’ebé mak prevee hodi halo pagamentu ba subsídiu ba agregadu familiar, hosi Ministériu Finansa transfere ona mai iha Banku Nasionál Komérsiu Timor Leste iha 01 juñu liubá hamutuk  millaun $59.6, ne’ebé mak sei selu ba suku sira hamutuk 434 esklui Rejiaun Administrativa Espesiál Oe-Cusse Ambeno (RAEOA) ne’ebé mak sei halo pagamentu ikus tanba iha faillansu tékniku balu.

Agora daudaun, nia informa, osan millaun $59.6 ne’e hatama ona ba konta bankária kada suku ne’ebé mak iha BNCTL no agora BNCTL nia papél no responsabilidade mak lori osan hodi halo pagamentu.

Tuir nia, BNCTL labele halo pagamentu ba kada benefisiáriu sira,  nune’e pagamentu sei halo to’o iha Postu Administrativu sira de’it. Maibé, nia dehan, atu kontinua halo pagamentu ba suku ne’e ekipa pagamentu mak bele halo ba benefisiária sira iha suku no aldeia.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here