Xefe Unidade ba Operasaun no Relasaun Internasionál iha Gabinete Prezidente Autoridade Rejiaun Administrativa Espesiál Oe-Cusse Ambenu no Zona Ekonomia Espesiál Sosiál Merkadu Timor-Leste (RAEOA-ZEESM-TL), Agustinho Caet. Imajen Tatoli/Cipriano Colo.

DILI, 02 juñu 2020 (TATOLI)–Xefe Unidade ba Operasaun no  Relasaun Internasionál iha Gabinete Prezidente Autoridade Rejiaun Administrativa Espesiál Oe-Cusse Ambenu no Zona Ekonomia Espesiál Sosiál Merkadu Timor-Leste (RAEOA-ZEESM-TL), Agustinho Caet, hateten iha semana ne’e nia laran Prezidente Autoridade José Luis Guterres ‘Lugu’ sei submete lista kandidatu ba sekretáriu rejionál sira  ba Primeiru-Ministru, Taur Matan Ruak.

Notísia Relevante: Reprezentate Povu Atoni Hatama Petisaun Hasai Lugu hosi RAEOA

Caet hateten, lista kandidatu ne’e sekretáriu rejionál sira hamutuk ema na’in-sia (9) maioria Oe-Cusse-oan ne’ebé sei kompleta estrutura autoridade nian.

“Autoridade la falla tanba iha semana ida-ne’e nia laran, Prezidente Autoridade sei lori naran kandidatu sekretáriu rejionál na’in-sia (9) atu submete ba Primeiru-Ministru, Taur Matan Ruak,” dehan Caet ba Ajénsia TATOLI liuhusi telefonika hodi responde ba petisaun hosi reprezentante povu Atoni foin lalais, ne’ebé hateten Prezidente autoridade Lugu laiha kapasidade no falla hodi nomeia sekretáriu rejionál sira, tersa ne’e.

Caet hatutan, tuir loloos Prezidente submete ona lista ne’e hafoin simu pose iha fulan novembru 2019 maibé tanba desde simu pose Lugu hala’o servisu iha situasaun polítika ne’ebé la estável, nune’e semana ne’e sei submeta duni ba PM.

“Uluk ita prepara tiha ona naran sira-ne’e maibé tanba mudansa politika uitoan, nune’e autoridade mós pauza tiha tanba hakarak atu apar ho situasaun politika. Bainhira iha ona estabilidade politika, liuliu iha governativa ne’e, no agora governu ne’e metin ona entaun iha semana ne’e nia laran Prezidente autoridade sei  submete ba Xefe Governu,” nia esplika.

Nia dehan tan, sekretária rejionál sira ne’ebé oras ne’e autoridade prepara hamutuk na’in-sia (9). Antes ne’e, iha autoridade anteriór iha sekretáriu rejionál na’in-hitu (7) maibé agora aumenta tan na’in-rua (2) tanba ezijénsia hosi nesesidade servisu.

“Na’in-rua foun ne’e, ida ba Aasuntu Sosiál no Antigu Kombatentes, ida fali ba Asuntu Obras Públika. Restu, na’in-hitu ne’e mantein. Na’in-sia ne’e maioria Oe-Cusse-oan no ida de’it mak la’ós ema Oe-Cusse. Tanba ne’e konfiansa hosi Prezidente autoridade rasik, hanesan buat ne’ebé nia rasik deklara ona bainhira simu pose iha novembru 2019,” Caet subliña.

Entretantu, tuir kompozisaun anteriór, Sekretáriu Rejionál sesante kompostu hosi Sekretáriu Rejionál ba Asuntu Edukasaun no Solidariedade Sosiál Arsénio Paixão Bano, Sekretária Rejionál Asuntu Finansa, Leonia da Costa Monteiro, Sekretáriu Rejionál ba Ordenamentu Territóriu no Kadastru Pedro de Sousa Xavier, Sekretáriu Rejionál ba Asuntu Administrasaun Francisco Xavier Márques, Sekretáriu Rejionál ba Asuntu Agrikultura no Dezenvolvimentu Rurál Regio da Cruz Salu, Sekretária Rejionál ba Asuntu Saúde Lucia Taeque, Sekretária Rejionál ba Asuntu Turizmu Komunitária Inácia da Conceição Teixeira.

Prezidente Autoridade RAEOA, José Luís Guterres, simu pose hosi Primeiru-Ministru, Taur Matan Ruak, iha 13 novembru 2019 no mandatu eis Sekretáriu Rejionál sira RAEOA nian ramata iha loron 01 janeiru 2020.

Foin lalais ne’e, reprezenta povu Atoni hatama petisaun ba órgaun soberania tolu hanesan Prezidente Repúblika, Parlamentu Nasionál no Governu hodi ezije hasai Prezidente Autoridade Rejiaun Administrativa Espeiál Oecusse Ambenu (RAEOA), José Luis Guterres (Lugu), hosi nia kargu tanba konsidera laiha kapasidade atu ukun.

Iha pontu dahaat hosi pestisaun ne’e sita katak, durante fulan hitu José Luis Guterres Falla atu nomeia sekretáriu rejionál sira maibé nomeia no halo fali kontratu ba tékniku sira, inklui asesór bara-barak hosi Dili hodi ignora kompromisu atu tau prioridade ba Oe-Cusse-oan no selu ho saláriu boot.

Jornalista : Cipriano Colo

Editór        : Cancio Ximenes

2 KOMENTÁRIU

  1. Ami hein kumesa horbainhira tiha ona ……ami mos haluha ona. Sei la bele aprezenta..Asesor sira mos diak ona !!!!
    Ami povu ne’e simu deit @@@

HAKEREK NO HATÁN

Please enter your comment!
Please enter your name here