Joven na’in-neen (6) hosi Oe-Cusse, reprezentante Povu Atoni, hala’o Konferénsia Imprensa iha Restaurante Jade Praia dos Coqueiros, hodi ezije Governu atu hasai Prezidente Autoridade Rejiaun Administrativa Espesiál Oe-Cusse Ambenu (RAEOA), José Luis Guterres (Lugu), hosi nia kargu. Imajen Tatoli/Cipriano Colo.

DILI, 01 juñu 2020 (TATOLI)–Reprezentante povu Atoni entrega petisaun ba orgaun sobernu tolu hanesan Prezidente Repúblika, Parlamentu Nasionál, no Governu, hodi ezije hasai Prezidente Autoridade Rejiaun Administrativa Espesiál Oe-Cusse Ambenu (RAEOA), José Luis Guterres (Lugu), hosi nia kargu  tanba konsidera laiha kapasidade atu ukun.

Notísia Relevante: Agostinho Caet: “Lugu La Abandona Mak Povu Atoni Hetan Ona Apoiu Umanitáriu”

Hafoin entrega petisaun refere, joven na’in-neen (6) hosi Oe-Cusse ne’ebé reprezenta povu Atoni ne’e, hala’o kedas Konferénsia Imprensa iha Restaurante Jade Praia dos Coqueiros, ne’ebé hateten katak petisaun ne’e hetan apoiu no abaixu asinadu hosi ema na’in-100 hosi Oe-Cusse.

Iha konferénsia imprensa ne’e, Portavós Povu Atoni, José Tefa, haktuir pontu importante hamutuk 16 mak hanesan;

Primeiru, Prezidente Autoridade José Luis Guterres desde simu pose iha fulan Novembru 2019, to’o oras ne’e, sei kontinua hela permanente iha Dili no fim de semana mak mai iha Oe-Cusse no vizita liu de’it hotu fila-fali ba Dili.

Segundu, durante assume kargu hanesan Prezidente autoridade, José Luis Guterres, rejeita atu hela iha uma estadu no deside ba hela fali iha uma privadu.

Terseiru, durante fulan hitu, laiha eskritóriu permannete atu hala’o enkontru maski eskritóriu Prezidente autoridade nian iha kampaun autoridade RAEOA Oebau abandonadu no nunka uza maibé uza fali sala enkontru hodi asina dokumentu sira.

Kuartu, durante fulan hitu José Luis Guterres falla atu nomeia sekretáriu rejionál sira maibé nomeia no halo fali kontratu ba tékniku sira, inklui asesór barbarak hosi Dili no selu ho saláriu boot, tékniku no asesór hirak ne’e loro-loron la servisu maibé kada fulan manan osan boot maski povu Oe-Cusse halerik tanba hamlaha.

Kintu, mekanizmu halo kontratu ba tékniku no asesór sira la tuir prosedimentu legál no ignora lei funsaun públiku, no dekretu lei kona-ba kontratu traballu no termu sertu.

Sestu,  prezidente autoridade promete atu promove Oe-Cusse-oan sira hodi assume kargu iha gabinete RAEOA maibé realidade lori fali ema hosi Dili no munisípiu seluk mak halo servisu iha Oe-Cusse.

Sétimu, durante fulan hitu, simu ona mandatu nu’udár Prezidente Autoridade, maibé José Luis Guterres la tau matan no la sériu atu jere obra boot sira husi fronteira Sakato to’o Ponte Noefefan.

Oitavu, Prezidente Autoridade laiha kapasidade atu jere administrasaun tuir knaar ida-idak nian iha RAEOA, ezemplu tuir loloos fahe fós no supermie ne’e kompeténsia no responsabilidade diresun solidariedade sosiál RAEOA nian maibé durante ne’e Prezidente Autoridade ho nia tékniku ho asesór sira mak distribui fali fós ba komunidade.

Nono, durante ne’e nunka konvoka enkontru ho estrutura kargu diresaun no xefia iha RAEOA.

Désimu, hatuun billete aviaun ZEESM-TL ho folin $25 kada ema ba viajen Dili-Oe-Cusse maibé sakrifika fali Orsamentu Jerál Estadu hodi halo fali manuntensaun ba aviaun refere. Aktu ida ne’e konsidera mall jestaun.

Désimu Primeiru, ezekuta Orsamentu duadésimu arbiru de’it gasta osan arbiru no la tuir regra finanseiru ne’ebé hatuur nanis ona.

Désimu segundu, kontratu no selu asesór prinsipál Ricardo Nheu ho osan $7.000 kada fulan no Francelino Freitas ho osan $6.500 kada fulan, atu halo promosaun no mobiliza invetsimentu ba RAEOA maibé realidade seidauk iha investimentu ki’ik-oan ida no hela de’it iha Dili hodi goza de’it povu nia osan.

Désimu Terseiru, kontrata asesór senior ba asuntu politika, Romeo Moises ho osan $5.000 kada fulan maibé hela permanente iha Dili no tuir loloos RAEOA la presiza Asesór Politika.

Désimu kuartu, Prezidente RAEOA iha xefe gabinete rua, ida servisu iha Oe-Cusse no ida seluk servisu iha Faról Dili ho saláriu boot maibé volume servisu kiik.

Désimu Kintu, kontrata Zezinho Gusmão hanesan adjuntu koordenadór no asesór legal ba servisu koorporativu no jestaun ba área aeroportu no navegasaun ho osan $6.500 kada fulan maibé fulan hitu ona aviasaun ZEESM-TL nunka tuun iha Oe-Cusse.

Désimu Sestu, husu ba Primeiru Ministru Taur Matan Ruak atu indika no disponibiliza ekipa integradu ida hosi órgaun kompetente hodi halo auditóriu ba servisu hotu inklui ezekusaun Orsamengu Jerál Estadu iha RAEOA.

Antes ne’e, Sosiedade Sivíl Rejiaun Administrativa Espesiál Oecuse Ambenu (RAEOA) diskontente ho Prezidente Autoridade, José Luis Guterres, no hato’o mós preokupasaun hanesan ne’ebé husu ba Governu sentrál atu hasai Luis Guterres hosi Oe-Cusse.

Antes ne’e mós, Xefe gabinete interinu Prezidente Autoridade Rejiaun Administrativa Espesiál Oecusse Ambenu (RAEOA), Agustinho Caet hateten, durante ne’e Prezidente Autoridade José Luis Guterres (Lugu) la hela metin iha Oe-Cusse tanba kestaun politika rai laran ne’ebé ezije tenke hakbesik ba Governu nasionál, oinsá halo negosiasaun atu hetan apoiu ba povu Oe-Cusse ne’ebé enfrenta problema oin-oin.

RAEOA iha Suku 18 mak hanesan Suku Costa, Cunha, Lalisuk, Nipane, Naimeko, Lifau, Taiboko, Bobokase, Lela-ufe, Suni-ufe, Ban-Afi, Usi-taku, Bene-ufe, Malelat, Abani,  Usitasae, Usitaqueno no Bobometo ho dadus uma-kain tinan 2020, hamutuk 19.839, hosi sub-rejiaun haat no aldeia 63.

Notísia Relevante: Agostinho Caet: “Lugu La Abandona Mak Povu Atoni Hetan Ona Apoiu Umanitáriu”

Jornalista : Cipriano Colo

Editór         : Cancio Ximenes

HAKEREK NO HATÁN

Please enter your comment!
Please enter your name here