Lider Karizmátiku, Kay Rala Xanana Gusmão, observa direita kondisaun saúde komunidade, Jeremias Aparicio ne’ebé sofre moras oin lulik nakfera. Imajen/Eugénio Pereira

DILI, 01 juñu 2020 (TATOLI) – Lider Karizmátiku, Kay Rala Xanana Gusmão, segunda (01/06/2020), halo vizita no  haree direita kondisaun saúde Jeremias Aparicio ne’ebé durante tinan hitu (7) ona sofre moras “oin lulik’ nakfera hodi halo nia kondisaun saúde moris terus tebes.

Notísia Relevante : Populasaun Kbiit-Laek 113 Agradese ba Xanana

Jeremias Aparicio, tinan 45, kaben ho Maria Sarmento, iha oan na’in-neen (6) husi Postu Administrativu Uatucarbau, Munisípiu Viqueque, dezde tinan 2013, sofre moras “oin lulik” nakfera bainhira monu husi nuu-leten.

Iha momentu ne’ebá, família lori kedas vítima ba Ospitál Viqueque hodi transporte kedas mai Ospitál Nasionál Guido Valadares (HNGV) hodi halo operasaun, maibé tanba kondisaun ekipamentu ospitál menus fasilidade no labele halo operasaun, tanba ne’e  halo Jeremias tenke sofre moras tinan-hitu (7) no obriga nia kada semana rua halo vizita beibeik ba ospitál para médiku observa nia kondisaun saúde hodi tau mangeira nia “oin lulik” para ajuda nia soe bee-kiik.

“Ha’u sa’e nuu maka monu tun mai kona fatuk rezulta ha’u nia “oin lulik” nakfera,” hateten  Jeremias Aparicio ba Xanana ne’ebé halo vizita ba nia rezidénsia iha Aldeia Bedois, Suku Camea, Postu Administrativu Kristu Rei, Dili.

Iha fatin hanesan, reprezentante família, Martina Alves hato’o ba Xanana katak,  parte ospitál rasik  deklara moras ne’e so bele halo operasaun  iha Singapura, maibé tanba família kbiit-laek ba osan maka to’o agora la bele halo buat ida.

“Tinan hitu ona nia sofre moras ne’e, maibé ba halo operasaun iha ospitál doutór sira dehan moras so bele halo operasaun iha ospitál rai li’ur, maibé ami moris susar entaun ami labele halo buat ida,” Martina hateten  ho triste boot.

Haree ba sofrimentu ne’e, Xanana husu atu Jeremias kalma hodi hein too situasaun COVID-rekupera ona iha Timor-Leste inklui Singapura ka Australia, foin nia parte koordena ho doutór sira hodi haruka nia ba halo operasaun iha rai li’ur.

“Agora ita hein uitoan lai, bainhira COVID-19 iha Timor-Leste no Singapura normál oin, ita foin haruka ba tratamentu iha Singapura, tanba agora aviaun la iha, ha’u sei ko’alia ho doutór sira iha ospitál para buka solusaun,” Xanana  hateten.

Família inklui pasiente ne’e rasik agradese ho Xanana nia vizita bele ajuda sofrimentu ne’ebé vítima enfrenta atu bele halo operasaun lalais.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here